● 家燕姐笑言跟型男有好多眼神接觸。香港文匯報訊（記者 梁靜儀）薛家燕（家燕姐）預計月底將榮升嫲嫲，BB未出生已經腳頭好好，帶挈嫲嫲與爸爸Jackson接拍果汁廣告，負責執導的Jackson更請來6呎嫩口型男做廣告男主角，家燕姐笑指與型男合作令她有回春的感覺。
家燕姐表示拍廣告期間，要狂灌果汁落肚，要不停上洗手間：「起碼飲咗3支果汁，搞到成日去廁所，但我鍾意飲，拍完剩番啲我都話唔捨得倒咗去，留番之後飲，所以愈飲愈多！我平時都鍾意飲果汁，仲要係無添加，而且Free嘅梗係飲多啲啦！」
再次母子檔合作，家燕姐指Jackson要求一次比一次高，上次要她做Captain Nancy打了十幾廿次，今次則嫌她飲果汁飲得唔靚：「Jackson話要做啲誘人動作，我都唔知點解要誘人，所以要問吓監製即係Justina （珊珊），佢兩個度好晒，有晒Storyboard，話係客戶要求喎。」雖然Jackson要求高，但家燕姐指Jackson一早做好準備功夫，可以準時收工，合作得很開心。
家燕姐又大讚今次廣告拍檔Daniel有型又識做戲，更令她有回春感覺：「因為廣告要表情十足，Daniel又做得幾好，睇番Play Back發覺我哋幾襯，我直情成個青春晒，（有冇掂到型男手仔？）手仔？有冇掂到呀？um眼神呢......哎呀，眼神呢......流口水𠻹，眼神好多接觸，手仔就應該冇掂到。」
問到家燕姐多久沒有掂過男仔手仔？她笑說：「我成日同人握手嘅，哈哈！咁拖吓手仔都係禮貌嚟，你知我隨和，又充滿偉大嘅愛，如果真正拖手仔呢排就冇喇，可惜因為疫情關係，大家要天各一方，惟有靠手機同電腦傾偈，希望可以快啲拖到手仔啦！」