香港文匯報訊（記者 梁靜儀）無綫《好聲好戲》前晚播出第12集，多位專業評判在節目中露一手，聲演參賽藝人演出過的劇集片段。其中曹啟謙聲演張振朗與蔡思貝在劇集《踩過界II》中的決裂場面，張振朗、蔡思貝重溫片段時睇到眼有淚光。張振朗解釋《踩過界》到《踩過界II》係累積咗3年來，有好重嘅感情，睇返就好感動！張振朗又透露最近買了新電單車。
無綫節目《好聲好戲》前晚播出的一集，由4位專業配音員反過來聲演參賽者曾演過的劇集戲份，其中曹啟謙就聲演張振朗於《踩過界II》的角色與蔡思貝決裂的一幕，振朗與思貝聽完後竟雙雙落淚，振朗哽咽說：「因為我同思貝都好鍾意呢場戲，由《踩過界》到《踩過界II》係累積咗3年，有好重嘅感情，頭先睇返就好感動，你配得好好，我演嗰時口齒不清，你幫我完整咁將佢嘅心聲同心路歷程講返出嚟。」
最後振朗獲得專業評判團及主席評判團一致通過，以4票擊敗對手黃翠如、鄧智堅及謝嘉怡，成為第二位出線的藝人，躋身總決賽爭奪傑出聲演總冠軍。事後振朗表示勝出好感恩，但要休息2日，因為聲音沙啞了。
盧雄鼓勵想做配音唔好灰心
另外，節目又安排王祖藍頒發「殿堂聲演」大獎表揚資深配音員盧雄，盧雄致辭時勉勵大家說：「未入行想做配音員，同埋入咗行覺得自己未受賞識啲人就唔好灰心，亦都唔使驚自己把聲唔靚，大家聽到我把聲有幾衰，如果唔係點會配成奎安呀？其實把聲靚與唔靚都唔緊要，只要有心機去做又肯去做，唔好灰心，一定有一日係會成功。」
盧雄上世紀七十年代加入商台，做廣播劇，亦曾在佳視做演員，後來投身電影配音行列，縱橫配音界40多年，作品無數，除了配音外，他亦有參與幕前演出，作品有《回魂夜》裏的保安隊長盧Sir、《九品芝麻官》的尚書大人，到八十年代他開班授徒教授配音，近年則主力參與舞台劇演出。
振朗大條道理買新電單車
此外，身為電單車發燒友的張振朗最近買了新車，他還大條道理地表示：「課金買車唔係為自己興趣，係以備不時之需，正所謂機會留畀有準備嘅人呀嘛！」他表明買車都係為之後工作要拍揸電單車場口時，都可以親身上陣，這個超強理由睇落真是無得拗！日前他更約了車友張繼聰一起遊車河，他還在社交平台上甫出一張手臂曬黑了的相，除了變兩截色之外，還有少少刺痛，有網民留言溫馨提示，叫他要注意搽防曬，亦有網民笑他手幼，似乎放錯焦點！