第一場、第五班、一二○○米。「電子」系嚴玉麟家族上季開始同方嘉柏合作，嚴生囝囝嚴子杰嘅「電子大師」加盟方廄之後即贏兩場，今季再添多一W才退役。嚴生太太嚴徐玉珊今季所養嘅「電子寶貝」亦順理成章交由方嘉柏訓練，雖然此駒出道八次仍係三零部隊，但近仗一再喺谷草千二有追勢，始終三歲馬要時間成長；七日前減夠分落五班卻增程跑一哩，性能上似乎嫌長多少，加上氣量尚未養成，頭兩段搶前之後入直路力弱，今次試準縮程係時候報喜。
第三場、第三班、一六五○米。「常拼常勇」母系有睇頭，出自「天文學家」的Starship歷來已有五匹子嗣運港，名氣最大是一級賽冠軍「喜裝寶」，可惜抵港後表現失望，目前已轉到澳洲繼續出賽。Starship其餘子嗣尚有「包裝之寶」及「喜旺寶」等，以「喜旺寶」贏過三級賽獅子山錦標成就最高，大部份都具千八米或以上長力。「常拼常勝」在英國時交予郗國思訓練，四戰兩冠兩位，之後放在拍賣會出售，三百多萬易主價錢亦合理。在英國贏一哩以放頭為主，以多匹半兄長在港表現，此駒應合跑谷草兼有能力躋身更高班次，值得一敲。