第三場、第四班、一二○○米。「電訊超班」周歲價十萬澳元，在澳洲墨爾本出賽時已屬現馬主張敬山名下，來港插入三班起步後先減分，輸六仗已經減夠分降落四班，三月中跑同程配馬雅後上第四，末段造廿二秒四五快時間，仲快過同晚贏二班賽的「精靈武士」；之後三場轉用何澤堯同田泰安全部得亞軍，已見改善起步慢的問題；前仗被前領的「齊齊友福」先發制人走甩，姍姍來遲輸一個馬位；上場力拚之下以短頭位負於「正本歡心」，今次捲土重來可問鼎頭馬。
第六場、第四班、一六五○米。馬主樂其龍是嬰兒用品的老闆，過往養過「樂有贏」同「樂有盈」，前駒贏過五場，後駒以三零部隊身份出局，之後樂其龍約有三年多時間冇養馬，今季佢同兩位好友合夥重新養馬，正是今場隻「好拍檔」，希望三位一體，共同享受養馬樂趣。「好拍檔」係由賀賢親自買返嚟，質素應有保證，今季出道頭四次都是千二米，每次直路都後追甚勁，追勢如狼似虎，前仗谷草巴度末段受阻揪住過終點，呢個第四相當吸睛；上場轉去田草千四更啱追，配潘頓後上得亞軍，今次轉場加程跑一哩正合，睇嚟樂其龍有機會同兩位好拍檔拉頭馬。