 放大圖片
兩屆視帝郭晉安（安仔）於新劇《忠奸人》中奸到出汁，為演好這個攻心計的輪椅大律師「高哲行」，安仔積極投入角色，卻被18頁長的法庭戲對白考起，拍攝過程有點躁， 搞到老婆歐倩怡有點不好受，幸好倩怡懂得化解戾氣，難怪安仔大讚太太最抵錫。■場地提供︰The Air(The ONE) 採訪：植毅儀 攝影：莫雪芝
過往郭晉安演的多數是喜劇角色，今次在《忠奸人》中飾演一個有心計，坐輪椅的大狀，安仔坦言被傷殘揸車、推輪椅等動作考起。也因為拍攝的三個多月間，需用手代替腳去活動，傷及舊患，令右手麻痹，經過多月治療後已復原。「好多人以為我全劇坐輪椅拍戲好舒服，其實拍攝初期便遇上不少問題，特別是以手代腳推輪椅，人人以為好舒服，實際好困難。未拍之前我已經開始練習，自己推住輪椅四處去，專程找上膊位『chok』上去，拍的時候真的操到雙臂有『老鼠仔』。去斜路時最驚，試過在路中心跣胎打白鴿轉，差點翻車撼爆頭。另外拍揸車戲都好頭痛，不知傷殘人士座駕如何加速，上車又要拆輪椅。拍完後發現輪椅代步時用錯力，令雙手麻痹，醫咗兩個月，搵咗三個醫生，又針灸又啪骨後有好轉。做演員就係咁，很難預防意外，導演一叫開始我們就像鬼上身一樣投入。」
在卓羲面前NG覺窘困
其實安仔已經不是第一次做奸人，繼2008 年的《與敵同行》後再做奸角，但今次劇中的奸角奸得來十分內斂，帶給觀眾煥然一新感覺，平均收視也有25點，算是不錯的成績。外間反應不錯，但安仔自爆拍攝過程被18頁紙的法庭對白難倒，大部分場口的戲好似考試。「劇中我係大狀，要講大量法庭對白。有日要拍18頁紙，返屋企背咗成8日，背到成個人好躁，連老婆都怕咗我。所以老婆話都係鍾意我接喜劇，喜劇佢會開心點。打官司呢場戲，嗰日由下午四點開工，講到凌晨三點。除咗一個鐘頭食飯，足足拍咗十個鐘。劇中場場戲都係大挑戰，可以牽引到觀眾去繼續睇個故事。以前做奸人好多表情要做出面，正所謂畫公仔畫出腸，現在是講內心戲，劇入邊我半忠半奸，奸的時候我連表情反應都唔畀，選擇一種內斂的方法去做。第一場戲吳卓羲令我半身不遂，幾年之後再遇到我，發現我原來跛咗，佢好內疚，但嗰一秒鐘我要由驚訝變好嬲，之後又要諗我係個律師，第日好需要呢個人幫我，我要在一秒內要諗晒全部。個心理過程考倒我，搞到在吳卓羲面前NG了5、6次，都幾窘困。」
唔擔心收視問題
近年TVB的劇常被網民投訴沒新意，繼而令收視下跌，問到安仔這位視帝可有收視壓力？安仔自言做訪問一向實話實說，不會吹噓個劇如何好睇，況且現在的觀眾好有自己的一套，不是旁人可以左右收視。「我一向對收視不會有壓力， 反正咁多年來最好與最差的收視也試過。你可以從網上找到資料，最高50點仍是《戇夫成龍》，最低94年的《生死訟》只有17、8點又係我，兩齣劇也是我的作品，什麼成績也試過，我仲有乜驚呀？在我來說沒有任何收視壓力，因觀眾口味和看電視習慣已改變，我反而更重視坊間口碑，宣傳講甚麼也沒用，觀眾很明白現時宣傳伎倆。我只會實話實說，不會講有幾大場面。觀眾睇完頭三集認為唔得就走，若果觀眾追看第四集，便上MyTV 追返前三集，這是MyTV 正面幫到收視之處。《學警狙擊》就是一個好例子，觀眾只需Buy一個人，Laughing哥便是一個傳奇。」
|
放大圖片
