 放大圖片
巫斯義「精彩鬥士」事件定咗下周一審，呢次情況如何，真係好難講，事關今季有鄭雨滇及呂卓賢在前，兩劑都罰得幾甘吓，假如巫斯義真係有事，睇嚟刑期都唔輕，雖然呢邊老巫單嘢未審，但佢依然保持鬥志，實力馬交出應有水準，夜賽就替文廄「摯友無敵」取勝。另一方面，暫時同巫斯義瓜田李下無交收嘅蘇偉賢一樣有贏馬，拍住柏寶以「天長地久」及「帝聖神駒」剛剛夜賽贏一個孖寶，睇嚟呢對騎練，近期合作似乎甚為得心應手，繼上次賽馬日贏「真如燕」之後，騎練兩者踏入2015年，跑咗三個賽馬日，已經有三場頭馬進帳，只係元旦嗰日冇贏馬，不過嗰日其實柏寶亦有騎蘇偉賢馬上陣，騎隻「創基寶」跑得第二名，輸俾大熱門馬「英才」冇得好講，否則真係2015年跑三次馬贏三次。
今次日賽，柏寶與蘇偉賢呢對騎練組合又點睇，全日之中，柏寶替呢個馬房所騎「金龍華」，大有機會延續近期旺勢。事關呢隻馬質素好高，上季曾經兩次喺田草千六米跑第三名，咪睇只係第三名，呢兩仗水準都非常高，一仗係由「智者」贏，「陽明星星」第二，另一仗則由「陽明星星」贏，「各適其適」第二。大家睇一睇「智者」今季四戰，得冠亞季名次各一，雖然「陽明星星」跑一仗落敗，但呢一隻屬名氣馬，居三班早已被人視為超級貨色，「金龍華」可以同呢一批馬跑，證明三班要贏一定冇問題。馬房今季遲遲先至同呢隻馬出賽，目的好簡單，唔好唔出，最妙呢次同佢出戰一千米直路賽，呢個路程未跑過，識唔識跑，當然只有幕後至清楚，但只要睇睇同日之中，第三班除一千米直路賽外，仲有千四米及千六米呢兩個路程，馬房偏偏揀場一千米跑，顯然想恃質凌人，要吼有賠率實力分子，呢隻「金龍華」千祈咪走寶。
|
放大圖片
