 放大圖片
容天鵬歸期已定，佢打電話入馬房同手足講周五（今日）將返到香港，昨晨排位後嘅所有一切操練狀況，副練都要全部匯報。而容天鵬對旗下戰馬「贏男」特別緊張。排位日知道「贏男」由副練曾超祺操過之外，下午又要命副練同呢隻馬出機坪踱步，並與「新標誌」相伴，後者由一位外籍助手考驗。容天鵬另外吩咐佢大佬，當「贏男」及「新標誌」出去機坪踱步嘅時候，一定要將呢對馬踱步嘅情況，用手機拍低，然後再傳送俾佢睇睇。由於要拍片關係，副練曾超祺當然唔可以輕率咁替「贏男」做工夫，只見佢喺機坪一路踱步，一路小心控制韁口，等隻馬情緒集中，踱起上嚟就非常神氣，所以當呢條片傳咗俾倉主睇過後，亦覺得非常滿意，連帶拍踱嘅「新標誌」，倉主亦話有水準，所以呢隻「贏男」屆時出戰四班千六米，是有特別留意的必要。
「贏男」上次喺潘頓胯下贏千六，贏第二名「會心微笑」達四個幾身位，過程非常輕鬆，今次再吼番贏馬路程而來，基本上無乜閃失，再贏應該唔難，更何況呢次「贏男」雖然冇咗潘頓騎，但非常識得楔位嘅韋達，吼準良機搶番唔少潘頓實力坐騎披甲，好似上次夜賽咁，韋達「喜多盈」捧走一月盃，本來應該屬潘頓坐騎，後者因為停賽，韋達做番啲游說工夫，終於俾番佢跑，結果又係一個機會做就到韋達增添頭馬，今次「贏男」因潘頓停緊賽騎唔到，韋達自荐上陣，當然會做番齣好戲。
|
放大圖片
