文匯精選：秋月春風擺脫二奶命

放大圖片

剛周三夜賽，沈集成隻「無敵猛將」退出比賽，因為呢隻馬被查到有違禁藥，要另定日期處理，由於查到馬匹用違禁藥，搞到成個馬房要搜倉，不過最終都冇其他嘢搜到出嚟，事後聽班手足講，馬房搜完倉之後，倉主留低所有工作人員，訓話咗一大輪，其實，呢次馬匹驗到違禁藥，只係有關工作人員處理得唔好，因為「無敵猛將」用開一隻由獸醫處方嘅止痛藥，要經常搽腳治療，不過，呢啲藥有禁用期，就係出賽前一段時間唔用得，否則就屬於違法，呢次馬房領嘢，又係工作人員唔小心，賽前仲搽呢隻藥，結果被驗到出嚟，隻馬當然要退出，倉主呢次被另定日期研訊，即係話罰硬錢，相信萬萬聲走唔甩，呢個唔小心，負責任由倉主一力承擔，唔發火訓話就假。好彩嗰晚，沈集成馬房爆隻「勝利寶石」出嚟，成三十四倍咁冷，之後仲有隻「華麗登場」入位置，呢一晚可以話大豐收，相信夠交罰款有突。另一方面，沈集成身為馬房阿頭亦相當大方，話說嗰晚「勝利寶石」爆冷捧走香港會盃，倉主決定由副練丁冠豪幫佢攞盃，俾佢威一威，好多副練，窮一生時間都未必有盃捧下，呢次沈集成刻意俾丁冠豪威一威，證明佢屬於幾有人情味嘅阿頭。

講番呢次日賽，倉主最重視旗下嗰隻「秋月春風」，呢隻馬有多少似啱啱夜賽由莫雷拉所贏嘅「連利之星」，經常二奶命，不過，後駒最終都可以贏番一次，呢次「秋月春風」，跑一千米直路賽，先後跑過八次，其中六次跑亞軍，就以最近一仗為例，以為好有機會可以贏番一次，點知又遇上一隻初出不明物體「有得威」，再次屈居第二名，呢次睇準機會再跑一千米直路賽，強敵「有得威」走咗去跑千二米，擺明益晒佢，所以今次「秋月春風」應該有機會贏番場。