 放大圖片
姚本輝馬房嗰隻「及時取勝」，相信大家都唔會太有印象，事關佢只係隻今季自購周歲馬，跑過一場田草千二米，但如果講番呢隻馬初出所跑第四名嗰場嘅三甲馬，頭馬係「又襟又準」、二馬「英才」及第三名係「飛來猛」，咁大家就會有多少記憶。一直以來姚本輝所買入嘅馬，通常短途方面大多數有保證，好似同日有份出戰嗰隻「有得威」咁，一出即贏田草一千米。「及時取勝」亦係由姚本輝同馬主親自喺澳洲購入，呢位馬主蕭先生，除「及時取勝」之外，仲養緊隻團體馬「龍城動力」，後者一月分已贏過一場泥地賽，不過呢隻馬到目前為止僅贏過三場咁大把，所以唔算得上係隻成績標青嘅馬，呢次蕭先生獨資購入隻短途馬，無非想過足拉頭馬癮。呢隻「及時取勝」個名係有段故仔，呢個故仔出自一碗「及第粥」，古時食「及第粥」，意指會三元及第高中狀元，而馬主與呢碗「及第粥」甚有淵源，先至將隻馬名改為「及時取勝」，原來蕭先生本身經營開粥品店，以前粥品店俾人印象，一定係大排檔，賣相點都唔會靚，不過蕭先生經營手法與別不同，所有由佢開嘅粥舖，間間喺旺點開張，而且裝潢一流，等啲客人舒舒服服歎粥，昨日佢又喺長沙灣開新舖，開張時請埋姚本輝到場剪綵，輝哥人到之外，當然仲要禮到，不過呢份禮物最好就係周日同蕭馬主贏隻「及時取勝」，大家諗一諗，以「及時取勝」贏馬用嚟做賀禮，你話幾好意頭。
|
放大圖片
