 放大圖片
第二場、第五班、一○○○米 。「上浦勇將」今季跑咗五場有三場走入前五名，最出色一役是前仗出戰此程，五檔起步早段留在較後位置競跑，入直路好似支箭咁殺上，最終僅追不及全程一步不蝕的「高山威龍」，而壓倒「麟轉乾坤」跑得亞軍，以「麟轉乾坤」其後再添一冠一季的表現來計，「上浦勇將」要贏取頭馬只是遲早問題，環顧今場對手唔算強，有機會出頭。
第三場、第四班、一二○○米。「帶寶來」上季養在呂廄的紐西蘭自購馬，喺三班跑咗四場，最似樣一場係喺田草1200米跑第五。今季由吳定強接手，上仗初出跑此程排六檔，早段沿欄領放，末段未能抵擋「鴻圖戰士」及「回鄉更好」衝刺跑季軍，不過跑第五的「春意逸然」其後再出於同程能提升名次入三甲，反映呢席季軍水準非一般，今場「帶寶來」各項條件較上場好，有力衝擊冠軍。
第四場、第四班、一八○○米。「靚橙」來港後首個目標是想跑打吡，反映幕後寄望甚殷，點知跑咗兩季幾都無法交出頭馬，不過今季終於否極泰來，最近兩仗持續上名，先是前仗出戰谷草2200米不敵「多多心得」和「飛翔星」得季軍；剛戰縮落跑此程，因漏閘早段遠離群駒，中段消耗不少氣力跟上大隊，直路尚有強勁餘力殺入亞軍，以咁嘅演出今季肯定唔愁冇馬贏，吼住唔會有錯。
|
放大圖片
