 放大圖片
（第一場）「常盈多」今季一落五班即在此程影相輸俾「樂在其中」得亞軍，其後回升四班又冇料到，典型升降機，重回五班牌面自然又高番晒，值得優先選擇。
（第二場）「及時取勝」雖是初跑窄場，不過十二月份曾渡江試過谷閘，對此場地並不陌生，季內三戰名次在二至四名之間，三歲馬好恨贏，轉場遇弱可破悶局。
（第三場）「勁勇威龍」今次與同系「高山威龍」分途出擊，本身有優先出賽權又用埋王牌，咁大陣仗照計應有所圖，杜利萊棄「盈豐駿駒」揀騎，可以睇高一線。
（第四場）「威利飛越」上場好明顯是何澤堯舞唔掂，落敗完全與實力無關，今次搵番舊拍檔李寶利，跑番於二班僅鬥輸俾「活力歡騰」得亞軍之演出，可還我本來。
（第五場）「特務飛龍」大前次曾締1分9秒9掄元，已是今場各駒締速最快，分量毋庸置疑，稍作回氣後又可再展攻勢。
（第六場）「連利之星」剛戰升班照贏，締速比前仗快達一秒咁多，四歲馬愈跑愈銳，谷草至今三戰獲兩冠一亞，數據可取。
（第七場）「財神」上仗初出幾乎監生吞，雖然只跑第三，但直路追勢是全棚馬最勁，擺明身懷高質，再接再厲，揚威在望。
（第八場）「共創輝煌」（圖前駒）上仗轉彎已走定外疊發力，無懼蝕位直路照衝贏對手，超班本色表露無遺，新勝馬唔怕繼續追，用到雷神如虎得翼，首選對象。
（第九場）「天時駿駒」今季跑八場有六場做阿二而未贏馬，認真唔夠運，上回更只是影相輸俾「比卡超」不足為辱，強手去後，有望擔正。
|
放大圖片
