一矢中的：勇創潮流鬥志高昂

放大圖片

近年華將搵食確實艱難，先不說年年成包尾大幡的湯智傑，如老大哥賴維銘，最近四季埋單頭馬量均在十五場頭馬以下，如今正在養傷更是復出無期，另一位阿哥級鄭雨滇自從季初停賽之後，最近先贏番一場「振興中華」，目前僅得七場頭馬在騎師榜下游的位置，至於蘇狄雄大前季尚能交出廿一場頭馬，上季僅獲十二場頭馬，今季過了五分三馬季，至今有八場頭馬尚算不差，查騎者向來不是欠缺支持或手風不順，而係跟他不時被罰停賽有關，才直接影響到成績。今次谷中夜賽係騎者停賽三日後刑滿復出，師父立即安排谷中一哩好手「勇創潮流」上陣，部署看來不似偶然，明顯係想給狄狄仔接風，搵番獎金彌補停賽損失。「勇創潮流」上季開始在谷中一哩搵到出路，近三戰此程配蘇狄雄取得兩冠一亞全入Q紀錄，上仗步速不利也能夠追入Q位，馬匹健康良好可拚必拚，鬥志不用懷疑，值得留神。