 放大圖片
上次谷草夜賽可算係沈集成最開心嘅一個賽馬日，呢晚佢並唔係贏咗好多場頭馬，只係贏咗一隻「威龍」咁大把，雖然呢一場係錦標賽，乃香港足球會百週年紀念盃，不過其意義就相當重大。記得嗰晚馬主曹光彪坐住輪椅捧盃，呢位老人家喺七、八十年代經已養馬，到今時今日依然支持香港賽馬，講出嚟俾大家聽，嗰晚老人家入場捧盃，經已年事九十四歲。身為練馬師嘅沈集成，訓練「威龍」時候比起平時一般馬要判斷得更準確，首先要判斷隻馬有好水準，之後再判斷可唔可以掃晒對手，三來用騎師發揮一定要搵啱人，並唔係一味大師傅就一定掂，事關宜家好多大師傅身家雄厚，一有風吹草動只會留番下次補鑊，當然一般情況可以有值得原諒補鑊機會，但「威龍」馬主乃老人家，呢次搏唔到，下次有冇咁精神再入場係另一回事，所以話上次「威龍」馬主能夠入場拉到頭馬兼捧盃，沈集成都咪話壓力細。
基本上「威龍」剛剛捧盃呢一戰，練馬師的確計好晒數，事關呢隻馬嗰場新降落四班上陣，形勢點都佔優，加上所用騎師楊明綸聽教聽話，早段冇跟「紅旗福將」、「星運俊爵」及「星際武士」等快馬搶埋一份，等到入直路先至將強橫後勁發揮出嚟制敵，贏得清脆利落，所以沈集成咁鬼錫楊明綸就係咁解。
咁當然楊明綸唔止騎呢個馬房一隻「威龍」醒，好似今晚另一隻沈廄馬「勝利寶石」（圖前駒），又係俾楊明綸騎出彩虹，呢匹馬今季由郭能贏過一場後，升上三班對手增強咗，但近三次用楊明綸騎獲一冠一亞成績，所以今次一樣指定由楊明綸操刀。上述呢一對馬「威龍」及「勝利寶石」，倉主喺周一排位日下午安排佢哋喺馬房地堂踱步，「勝利寶石」由徐貴良，「威龍」則由丁冠豪踱，兩駒喺地堂踱咗一輪，倉主及楊明綸則企喺欄邊睇兩隻馬嘅狀態進展情況，踱畢倉主意猶未盡，仲刻意安排呢兩隻馬教埋閘，講狀態真係唔錯，當倉主問到楊明綸點睇，綸仔就指一切要睇臨場步速，假如「威龍」嗰場有快步速，屆時將會有利佢爭取連捷，但「勝利寶石」嗰場就千祈唔好太多馬鬥搶，即步速太快對呢隻靠放頭食胡馬就冇咁有利，所以一切都要睇際遇，但睇兩場馬形勢，呢兩駒贏面都幾高。
悅欣賞復甦返主場
其實，除咗沈廄上述兩隻綸仔馬有唔錯爭勝機會之外，仲有隻大師傅馬要留意，呢隻就係出戰第二場四班一千米嗰隻「悅欣賞」，呢隻馬季初首三戰跑谷草千二米，一口氣取得一冠兩亞成績，當中贏馬一役係贏「塑料盈」同「萬醒駒」兩匹四班惡馬，賽事水準十分高，不過之後狀態就開始滑落，但最近一場田草千二米，隻馬用蔡明紹跑得第八名，輸三個餘馬位，閃閃身開始走番近，而呢隻馬過往三戰田草千二米係全敗，呢仗交俾蔡明紹都係諗住熱吓身提升狀態性質，果然求仁得仁，所以今次馬房拿拿臨同佢報番谷戰短途上陣，搵埋個好手郭能操刀，大家千祈唔可以輕視呢隻狀態經已復甦分子，以上呢三匹沈廄馬，有權替倉主增添頭馬進帳。
|
放大圖片
