|
行船跑馬三分險呢句說話應該無乜人未聽過，但明知山有虎，偏向虎山行亦都係一大道理，如果人人唔肯冒險，咁無人行船，無人跑馬，所以再高危工作都有人做，唔好話付出與回報相輔相成，基層消防員及警察人工都唔係特別高，但就好有意義，佢哋大都勇於為市民服務，當然好值得尊重，咁騎師呢，危險程度比其他行業更高，就算搵到錢都好應該，始終有乜冬瓜豆腐，小則受傷大則玩完，背後境況唔係他人所能理解。
早前日本著名騎師後藤浩輝於家中上吊自殺，被發現時已無晒反應，年僅四十歲就結束短暫人生，十分可惜。後藤浩輝過去曾來港於國際賽上陣，大概喺○二年佢策「喜高善」勝出安田紀念，該賽兩匹香港馬包括「正蝦王」及「紅辣椒」有份列陣，不過落敗。講番後藤浩輝，睇日本傳媒話佢性格樂觀，但自從試過墮馬重傷，情況就有少少唔同，就算對人歡笑，實際都無過去咁開朗，由於傷勢都幾嚴重，要花段好長時間康復，雖然付出努力並無白費，重跨馬背後成績相當優秀，可惜年頭後藤浩輝又再墮馬，頭部及頸部舊患再次觸發，或就因為擔心未來前途，又可能太過痛楚，睇唔開下了結餘生，留低太太同小女兒，即使非親非故，聽者都為佢家人難過，成功騎師名成利就令人羨慕，但風光背後無窮辛酸充滿風險，成功固然是種補償，卻非必然。
|
