 放大圖片
上星期何良（圖左二）一日內五駒蟬過別枝，「仁心仁術」、「海南花梨」及「健康真知」投霍利時，「一哥」去蘇保羅，另「大情人」就去賀賢，為此圈內外傳來陣陣哄動，驟眼看都幾得人驚，但稱之為兵變似乎流於言重，記得上年初，胡森短短兩個星期，多達九匹包括「青春得意」、「金叻星」、「春意溢然」、「中國好」、「上海先生」、「春天」、「金筷子」、「甜城效應」及「講心長勝」分別轉投李易達及霍利時，咁仲有成四十匹馬的何良，真係有排都未駛愁。
如果講真正兵變，早卅年前有一幕就絕對超巨型，一九八三年底澳洲籍練馬師賓士便於一日流失廿三駒，包括隨後贏多場的「河塘海」及「南海」等，事後回看，大部分馬匹名字，好多都有個「海」字，都於八六年上海幫造馬案出現。據知當年賓士乃上海幫集團首腦楊元龍棋子之一，甫反目便將勢力範圍內馬匹紛紛拉走，當時有說係被馬會踢走，反過來同馬會打官司的澳洲騎師馬彼得在背後發功，但點都好，一下子咁多馬拉隊走人，仲要係同一馬房，情況極之罕見，經此一役，賓士由中型馬房到得番「保勝」及「快旺財」等四匹，未幾佢亦宣布於季後退休，唯一安慰係呢四駒都留守至最後一刻煞科日，「快旺財」更於該季最後一戰，由賓士徒弟告東尼大勝，兩師徒都算好頭好尾。
|
放大圖片
