 放大圖片
飲咗酒第一件唔可以做嘅事，當然係揸車，因為醉酒駕駛，輕則撞傷人，重則搞出人命，第二件唔可以做就係打老婆，其實，唔飲醉酒都唔可以打老婆，話說近期面書傳緊一段對話，內容講受害者老公，一飲醉酒就郁手郁腳，曾經考慮離婚，但因為嗰女仲細，加上目前環境，打官司一定唔夠爭，所以忍氣吞聲，現時見一步行一步，而佢好多朋友都安慰佢。呢位打老婆主角，有傳屬馬圈中人，以往亦曾經因為飲醉酒打司機，最後輕判了事，估唔到宜家仲變本加厲。性格火爆，圈內好多人都會係咁，尤其最前線跑馬嘅騎師，可能陣上為爭一條罅位，落馬之後大家時有出言不順，亦曾有推撞鏡頭，呢個都係職業病，但一脫離咗工作崗位，將火爆性格帶埋入屋，變成家暴，咁就唔係幾好玩，呢單嘢，老婆呢一方經已忍讓，假如男嘅呢一邊再唔去檢討自己，無咗個家不特止，有可能事業都賠上。
告東尼呢排夾郭能，威到不得了，「將男」力抗外隊兩隻老虎，日本「善得福」及澳洲「模範駒」，贏得今屆女皇盃，「將男」告東尼及郭能，馬與騎練均屬第一次勝出呢個一級賽，的確可喜，呢次夜賽，郭能夾告東尼，又有一隻「美麗皇者」交俾佢跑三班一千米短途賽。呢隻「美麗皇者」，到目前為止經已跑過兩仗，初出跑田草一千米直路賽得第五名，再出轉跑谷草一千米，又係得第五名，但呢次只輸兩個餘馬位，比起首戰跑一千米直路賽四個馬位進步唔少，其實，上場谷草一千米，對「美麗皇者」屬一個大挑戰，事關佢運嚟香港出賽，在愛爾蘭五戰全跑一千米直路賽，換句說話，上次跑急彎短途，屬一個初步考驗，馬房見效果唔錯，呢次換上郭能，比起之前由蔡明紹及吳嘉晉騎，配搭強得多，騎練又有機會合作贏馬。
|
放大圖片
