 放大圖片
上個禮拜日高伯新同姚本輝鬥得非常燦爛，尾場當高廄「旅遊仁義」及姚廄「有得威」雙雙衝過終點後，原先係「旅遊仁義」影相贏，以為高伯新可連中三元，但之後未幾出現研訊及抗議符號，最終「有得威」抗議得直，變成姚本輝馬房起孖。單睇呢次「有得威」抗議成功事件，其實只係睇馬會點判，假如講走勢，「旅遊仁義」一定贏「有得威」，兩隻馬直路互鍊，雙方都無停過手，肉眼就係咁睇到。其實，上個禮拜仲有一個馬房好鬼威，佢就係沈集成，憑布文「阿甘」及貝湯美「超有利」贏馬起個孖寶，兩隻馬能夠贏到，純粹係贏騎師嘅發揮，「阿甘」喺布文胯下逐步騎贏「雅寶」，而「超有利」喺貝湯美胯下亦發揮一絕，否則有機會俾柏寶「勝利之星」九十九倍偷雞成功。
所以呢兩日沈集成心情非常靚，仲話自己係旺人，只要佢摸邊隻馬就贏邊隻，確實「阿甘」及「超有利」賽前都由佢摸過及操過，贏馬並非不勞而獲，今次夜賽，佢好有信心咁指旗下馬匹依然有旺氣支持。其中，經倉主特別細心留意及摸過操練嘅馬有「叻陶寶」及「金匯龍華」，喺最後試跑朝，倉主吩咐咗楊明綸入馬房替「金匯龍華」踱步，另外仲搵助手騎「叻陶寶」一齊喺馬房地堂考驗，只見倉主金睛火眼睇到實一實，倉內手足亦都大讚兩隻馬弗。
「叻陶寶」近兩場谷草千二米經已有入位成績，如今進度更好，躁火無晒，倉主亦好希望盡快同呢隻馬建功，於是搵埋雷神幫手，希望集合人強馬壯兩項最有利條件於一身，替幕後贏番場，係穩陣馬膽之材。
金匯龍華馬主闊綽
另外隻「金匯龍華」，近兩場跑谷草一哩取得一冠一亞成績，雖然呢兩場都係四班賽，但以上次潘頓贏馬姿態所見非常輕鬆，今次升上三班，由於負輕磅跑關係，一早搵定楊明綸掛帥，幕後依然睇好呢隻馬能夠再捷。馬房班手足亦好希望呢隻馬可以再贏，事關馬主出手好闊綽，贏馬必大派紅錢，上次贏完馬，翌日幕後就有人入馬房探班派紅錢，所以呢一系馬係好受馬房歡迎，總之佢一贏馬，成個馬房就皆大歡喜。
及時取勝教閘搏殺
上次因為郭能受傷，臨時換上吳嘉晉出擊嘅「及時取勝」，今次重新配回郭能披甲，姚本輝希望可以同呢隻馬拚個明白。倉主連日來都好緊張呢隻馬，前日更吩咐呂卓賢下午留喺馬房幫手，同呢隻馬教閘，結果呢隻馬非常乖巧咁順利完成。講狀態「及時取勝」經已愈嚟愈靚，難怪馬房咁心急再搵郭能同呢隻馬上陣，馬本身前速銳利，角逐一千米相當合發揮，不妨作為重心馬看待。
潘頓今晚適宜出賽
潘頓上周因腎石毛病入院接受手術，被迫退出女皇盃大賽日，但昨天早上已恢復策馬進行晨操及參與試閘。其後經醫生證明，適宜履行今晚策騎聘約。然而，潘頓因接受治療而未能減磅，所以有兩駒因未能造磅而需要更換騎師，分別是第七場「執到寶」及第八場「慷慨寶」，均改配薛寶力。
|
放大圖片
