 放大圖片
第五場四班千二米，大家都睇到一個現象，就係「金筷子」由騎開嘅黎海榮換上柏寶，呢隻馬一向屬黎海榮私家坐騎，雖然開咗齋之後，再跑兩仗都係影相僅輸，但係黎海榮經已盡咗最大努力，所以幕後要換人亦無辦法。雖然柏寶騎功會較黎海榮高多少，但實際陣上分野，會唔會高到可以同「金筷子」贏番一場，咁真係要跑過至知，而「金筷子」實力見晒，今次孭頂磅再加個十二檔，顯然存在一定風險。另一方面，黎海榮雖然喺呢場馬中失咗「金筷子」策騎權，但同場又有一匹嫡系馬交番俾佢上陣，呢隻就係「大地和平」，由於黎海榮季內贏過同主馬「大地王者」關係，所以幕後好信任呢位華將，雖然「大地和平」上次由薛寶力於田草千二米跑入一席第三，但黎海榮可以騎番，幕後當然會益番佢跑。今次黎海榮在各為其主下，亦唔驚佢會對「金筷子」留手，始終「大地和平」季內仲未贏過，黎海榮照跑，假如順利贏咗出嚟，相信「金筷子」幕後都唔會怪佢，另一方面，從「大地和平」霍利時馬房傳出，今晚呢個倉有兩隻勇馬可以一捧，一隻當然係「大地和平」，另一隻就係「常妙星」。據馬房打料師所指，呢兩隻馬近日胃口非常好，將所有飼料食清光，其中動態最特別係「大地和平」，近期下午行街，多數拍住「常妙星」一齊，當「大地和平」有機會置身喺「常妙星」後面時，佢就非常百厭，經常張口咬向「常妙星」屁股，有時「常妙星」不勝其煩，於是打起雙飛踢「大地和平」，當然，兩位馬伕唔會容許呢件事情繼續落去，一見「大地和平」有咬人動作，馬伕醒目，立刻拖開，避免遭受馬匹打雙飛而令「大地和平」受傷害。
喺周六有四班千二米「大地和平」都唔跑，專登提早跑今場無根據嘅谷草千二米，呢個部署得唔得就要幕後至清楚，不過咁睇，呢隻馬嘅同兄弟馬中有隻「摯友無敵」跑谷草千二米係非常犀利，可能幕後睇中咗呢點緣故。當然，假如「大地和平」適合谷草千二米發揮，俾隻馬喺呢個場地殺出一條血路，相信季尾仲有機會執多一兩場。
常妙星有分頭值博
至於「常妙星」，馬房今次仍安排佢跑谷草一哩，隻馬最強項路程當然係田草千四，季內贏過「飛霹靂」，呢個禮拜六，四班有兩場田草千四米，但幕後唔同佢報名，專登再攻谷草一哩，呢個路程上場第一次跑，排十二檔得第四，今次原庄配搭再嚟過，試到準晒，幕後又點會無緣無故同呢隻馬出戰一場無贏馬紀錄嘅路程，故必定有信心咯。
大摩好關心新力鷹
大摩早兩日飛咗去泰國度假，不過佢會趕番嚟督師夜賽，睇睇呢個馬房贏完冠軍一哩賽之後，今次出戰馬匹得兩隻，可能係想俾機會馬房內班手足回一回氣，但今晚兩隻戰馬「獅鷲」及「新力鷹」，呢兩隻飛禽，大摩似乎好鬼重視，佢唔喺香港期間，依然要梅姐傳短訊俾佢，匯報一下呢兩隻馬嘅最新動態，尤其隻「新力鷹」動態非常關心，呢隻季內未交代馬，今次轉手用柏寶一試，隨時可以係兩隻馬嚟，大家小心。
|
放大圖片
