 放大圖片
近日聽聞嗰幾個包尾倉口想向馬會大控訴，指控內容大致因為所處馬房位置，設施不足搞到成績低落，呢幾個馬房係霍利時、孫達志、鄭俊偉及胡森。原來呢四個馬房，就係放喺奧運倉嗰四個，即一千米直路賽起步點附近地方，呢四個倉同其他馬房唔同，另外嗰二十個倉，全部喺跑道另一邊，設施齊備，奧運倉設備來源，係自從搞完奧運馬術比賽後，就留俾呢四個倉用，初期會方承諾會逐步加強設施，但日子一日一日過，設施依然冇乜點改善，本來都唔係咁大件事，但日積月累，喺奧運呢四個倉，近一兩年要打護級戰，好似上年咁，孫達志僅得十五W剛剛合格，而霍利時及鄭俊偉，分別得十七及十八W，叫做過到關，不過胡森就只得十三W，第一季接警告信。好嘞，今季戰幔再揭開，以為明天會更好，點知呢四個奧運倉成績一樣冇乜改善，霍利時雖然上咗岸，但成績一樣冇乜大進展，同上季差唔多，最慘依然係胡森，暫時仍只得九W，假如呢季又唔達標，出年再接第三封警告信，咁就要拜拜。至於鄭俊偉及孫達志今季一樣要護級，前者亦只得九場頭馬，孫達志最少得七場，後者想成功上岸相信有難度，佢哋想話齊齊聯手向馬會投訴，希望奧運倉未來日子，真係會有所改善，令到成績有改進，不過，呢個控訴幾時交上馬會，仲要等呢幾位練馬師開會商討吓。
而一向成績唔係太過突出嘅吳定強，每逢季尾都係佢發力嘅時候，啱啱呢次夜賽，徒弟賴維銘替師父贏咗隻「金珀龍華」，目前已贏到十二場頭馬，仲差三W就達標，今次日賽，旗下「帶盈來」再戰四班千四米，相信頭馬可以手到拿來，事關呢隻馬目前兩W都係喺四班取得，由於低分起步，所以現時只負一三三磅跑，相信呢隻當勇馬可替馬房再增添頭馬進帳。
|
放大圖片
