獨有消息：忠心義氣力哥緊張

放大圖片

經常成為冷殺手嘅薛寶力，啱啱夜賽真係唔夠運，好似替吳定強騎嗰隻「勁駿皇駒」咁，以為可以贏番次，點知遇到隻初出攔路虎「有心人」。又好似替葉楚航騎隻「聰敏不凡」咁，雖然潘頓唔騎，賽前潘頓揀「勝飛」上陣，最終因身體不適才換人，至於呢隻「聰敏不凡」一早搵定薛寶力，又係有全面取勝機會下，卻影相輸俾「帝聖神駒」，後駒恃住輕磅之利，否則，薛寶力又係可以憑呢隻馬建功。雖然薛寶力贏唔到馬，但呢個周末，佢依然有唔少實力坐騎，好似上場由佢爆冷取勝嘅「帝國驕雄」，今次增程跑千四米，外地呢個路程一樣有頭馬交出，必合腳法，所以大家唔使擔心呢隻馬增程之後，表現唔及得上場贏千二米咁，至於排十三檔問題，超級馬排乜檔都有機會贏。除咗「帝國驕雄」外，同日之中賀賢仲有隻實力馬「忠心義氣」關照佢，上場呢隻馬由何澤堯取勝，呢次因為何澤堯停賽關係，所以先至有機會用到薛寶力，而呢位奧地利騎師一早聽到有呢隻實力馬披甲，心情自然靚晒，然而靚還靚，佢都好緊張隻馬備戰情況。昨午，佢同倉主講下午將會入倉探班，結果午間食完飯無幾耐即見薛寶力出現，呢個時候，馬房經已安排咗「忠心義氣」副練李兆錚及「獨具慧眼」羅德權一齊於地堂踱步，據悉兩隻馬都非常弗，有機替倉主起個孖。不過睇動態，薛寶力咁緊張隻「忠心義氣」，單係入倉呢點，就知道佢好恨同呢隻馬贏多一場。