 放大圖片
鄭俊偉馬房上個禮拜六突然大發神威，憑「超群名駒」及「金剛仔」起個孖寶，目前頭馬躍升至十一場，雖然仲有四場先至可以上岸，但今季賽事仲有兩個月左右，保持正常水準發揮，一個月時間都夠追有餘。講番呢兩場頭馬，最令鄭俊偉喜出望外係贏「超群名駒」，自從兩季前由大摩馬房掃出嚟之後，經已有兩季幾冇贏過馬，一來本身隻馬經已有番咁上下年紀，二來跑谷草一哩，以往屬強項，現今衝力短咗，所以鄭俊偉索性同佢加個眼罩，縮跑田草千四米，呢一招果然奏效，而杜利萊今次真係發揮得好，終點前擒贏大摩隻落飛馬「多個世界」。至於「金剛仔」，季內三捷愈贏愈輕鬆，呢隻馬下仗再出，依然有機會同馬房增添頭馬，杜利萊又有提款卡喺手。
鄭俊偉贏完呢兩場馬後，成個都唔同晒，周日早課，請晒馬房員工食早餐，下午仲有兩打蛋撻跟尾，阿頭心情靚，工作人員開工亦零舍醒神，呢日佢專登吩咐副練下午騎隻「過關勇將」去彭福公園踱步，自己則咬住支「大茶瓜」，坐喺架高球車跟住睇隻馬踱步，跟完一輪，返馬房又再睇，動態就非常積極，事實上，呢隻馬喺彭福公園踱起嚟神態相當生猛，且毛色立立靚，有番以往贏馬時候嗰種神采。
呢隻「過關勇將」，今季由葉楚航馬房轉投鄭俊偉，上季呢隻馬養喺葉楚航度，仲有馬贏添，不過，上名率則嚴重偏低，可能咁嘅緣故，幕後今季轉轉環境，希望有個突破，但轉入鄭俊偉馬房至今，大起色就冇乜，季內跑過七場，只有一仗谷草一哩取得季軍，顯然實力方面有多少退化，但正如鄭俊偉練呢隻「超群名駒」咁，只要馬房有心機，加上幕後有啲耐性，贏馬只係遲早事，話唔定今次「過關勇將」經已到位，事關倉主經已一早卜定旺人杜利萊操刀。
|
放大圖片
