獨有消息：友瑩養郭能唔益下家

放大圖片

潘頓腎石好番未就唔知，但講戰意，佢一定好到加零一，點解咁講，假如身體狀況有問題，亦唔會咁快可以贏番馬，呢個都唔算奇，奇就奇在佢仲四處打探，邊度有好馬就落足嘴頭去撬嚟騎，好似呢次夜賽頭場四班一哩條件賽咁，葉廄旗下「友瑩養」，上次郭能跑入一席第二名，隻馬開始適應水土，點知潘頓就想同葉楚航攞嚟跑。當然，「友瑩養」點解潘頓咁夠膽向葉楚航開口，純因為佢騎開隻「友瑩格」關係，早一陣子贏完日本大賽後，又話去新加坡執金，馬主呢一邊，直情當佢神咁拜，不過咁，「友瑩養」部分馬主都好有人情味，認為郭能上場騎開好好哋，隻馬狀態亦開始好緊，冇理由贏得嘅時候就俾人撬甩，更何況郭能亦唔係二打六，正正常常嘅話，呢次「友瑩養」跑出水準，應該好大贏面，於是最終答案，郭能依然保得住帥權，不過，呢次「友瑩養」抽到個十二檔，呢個檔對一隻要跑一哩爭勝嘅馬而言，可以話非常蝕底，始終要蝕些少位。不過，另一方面亦唔到郭能考慮咁多，因為潘頓經已出盡法寶要搶嚟騎，今次攞唔到，並唔代表佢下次唔得，唯一保障到自己嘅最佳方法，只要贏出呢隻「友瑩養」，未來日子一定可以保得住呢隻馬嘅帥權。所以今次無論如何「友瑩養」都會鍊到盡，即使鍊唔贏，下次郭能再騎唔番隻馬，亦未必會益到潘頓執死雞。所以呢次排十二檔嘅「友瑩養」一樣要捧場，可能正因為咁，屆時仲可以分多兩蚊。