 放大圖片
今晚沙田編跑今季最後一次全泥賽，八場賽事頭場於下午七時十五分開跑，三T有七百多萬元多寶，六環彩則無累積，全晚並無設立盃賽。馬房方面，大摩、方嘉柏及高伯新均派出多匹實力分子列陣，當要優先留意動向，騎師方面，雷神及柏寶皆手執不少惡馬，值得重視。
第一場、第五班、一八○○米（泥地）。「和諧氣氛」大摩馬房三歲仔，季內九戰，頭六仗跑四班賽事一無是處，直到前仗降落五班，改爭泥地一哩即有料到，在郭能胯下擺前放入第五；上仗再來換雷神執韁，已露搏殺手影，並改跑法留後殺上追入配腳，而今趟大摩更揀千八米增程誓師，質新馬已告適應本地水土，在五班作賽勝在年富力強，今仗捲土重來有力叩響勝門。
自動導航值得捧場
第二場、第四班、一六五○米（泥地）。「自動導航」五歲中距離尺寸馬，喺季初打疊兩場泥地一哩及千八米兩Ｗ後，練者便安排稍作回氣兼調整評分；上仗沿用莫雷拉列陣田草二千米，排四檔起步留得較後，最後鬥拉士力拚不敵質高「紅白」個半馬位跑Q，狀態又見復甦，而今回方仔再報泥地一哩勝途，臨場有飛可捧場。
第三場、第四班、一二○○米（泥地）。「愛頑皮」四歲南非馬季內九戰，當中跑泥地千二米表現最為準繩，單係最近五度出爭此程共獲一冠三亞成績，可見場地性能卓越，上仗渡江出爭谷草千二，排劣檔也力戰所負不遠，今趟復爭泥地千二首本戲，交出水準可坐位望贏。
第四場、第三班、一二○○米（泥地）。「海紅寶」前速銳利之馬，上賽之前大摩安排專攻谷草短途，只連番入位置卻未能出頭；上次轉戰泥地千二即試出彩虹，一檔起步韋達沿途捉實前領，入直路未見轉腳已走甩馬群愈贏愈遠，最後以五馬位大勝開齋，勝後重加十三分備受重視，現升班再爭此程如釋重負，再下一城無難度。
第五場、第四班、一六五○米（泥地）。「大合照」（圖前駒）大摩S布法國馬，季內跑過十仗，於季中開始專攻泥地一哩及千八，結果先喺一哩取得頭馬，贏「喜利高」及「安利多」；惟勝後四戰只取一季一殿未能添食，而剛賽在此程影相僅敗，賽後韋達用心校砲，今仗排一檔起步，只要交出一貫作賽水準，必在三甲。
第六場、第三班､一二○○米（泥地）。「旅遊仁義」上仗出爭田草千二勝出，但係末段鬥拉士曾內閃干擾到「有得威」，結果被告甩貶落第二，搞到馬主仁義團體成員十分失望；而今練者揀泥地千二入紙，並強配雷神操刀，環看今場對手實力非強，且看轉跑泥地能否本利歸還補中交代。
開心旅程衝擊頭馬
第七場、第三班､一六五○米（泥地）。「開心旅程」四歲仔季內十戰取得一亞三殿仍未發市，看上仗用雷神競逐泥地一哩，排三檔起步以均速跑法留守第三位，轉入直路與「好老友」過招卻難越雷池半步跑得亞席，但已經拋甩季軍馬有一段距離，而今打鐵趁熱再爭此程，且看可否衝擊頭馬。
第八場、第二班、一八○○米（泥地）。「王者無敵」四歲北半球貴價貨，今季初出五仗包括打吡大賽皆未嘗一逞，看上仗轉爭谷草千八，臨場打到五十二蚊開跑，起步後跟前走，可惜入直路衝刺時一度失蹄，最後力戰「帝聖神駒」只跑第三，而今練者安排轉攻泥地千八，翻查此駒來港前曾贏二千米膠沙地，爭泥必有的放矢。
|
放大圖片
