 放大圖片
今晚谷草跑八場賽事，以B欄C彎跑道作賽，頭場七時十五分開跑，三T雖無多寶累積，惟六環彩有三百多萬元多寶，全晚並無設立盃賽。練馬師方面，喜於窄場搏殺嘅方嘉柏當要優先重視，另外徐雨石及告達理皆派出不少實力馬列陣，也要留意。騎師方面，韋達、柏寶及潘頓皆手執不少惡馬，俱要吼實動向。
第一場、第四班、一二○○米。「按一按」八歲老馬季內六戰拚搏唔多，然而最近兩戰降到落四班，兩爭谷草一千米皆後上追得兩咀，而上仗賽後一直操而不戰，埋門韋達用心校砲，顯見重視，今回競逐谷草四班千二，環看對手缺點多多，相信必會把握機會爭取季內首場頭馬。
晨采返窄場啟勝門
第二場、第五班、一六五○米。「晨采」季內連番拚搏下只獲四季兩殿仍與頭馬無緣，看上賽練者搵到薛寶力操刀，出爭未有贏馬根據嘅田草一哩，排十三檔起步下臨場十四倍，力哥沿途吊住馬群中疊，入直路兜出外欄打衝鋒殺入第三。而今趁勇復爭最拿手嘅谷草一哩，且看可否叩響勝鼓。
第三場、第四班、二二○○米。「多多心得」乃正牌三四班升降機，喺三班作賽實力稍落下風，表現一籌莫展，但係落四班跑就判若兩駒，看四月尾爭四班同程，配柏寶主轡後上力戰「心有靈犀」入Q，乃高水準賽績，加分後上番三班兩戰志在回氣兼減分，今次啱啱好減夠分又再報四班此程，馬房部署處心積慮，值得捧場。
第四場、第四班、一六五○米。「友瑩養」（圖5號）四歲仔進入季中階段漸見上力，剛仗出爭谷草一哩遺材賽，睇勻全場對手實力平平無奇，而本身又係馬房出賽首選，而且打埋王牌擺明車馬，但係唔好彩排喺十二檔出閘，郭能起步後即擺前走，守在前領馬側二疊位，大半程走蝕位下最終跑得第三，而今次操足再爭此程，排回個有利四檔兼由潘頓接手，出頭厚望。
第五場、第三班､一二○○米。「中華寶貝」早在一月尾於田草千二米有好走勢，沿途走外疊，結果只落後「活力寶」個半馬位跑第五，已見適應本地作賽環境；打後三仗雖名次倒退，但實際表現比名次出色；上回首次渡江，並角逐千二米，結果於柏寶胯下一氣放到，以五十五蚊打開在港勝門，而今次瞄準贏馬路程，當可再下一城。
第六場、第三班、一二○○米。「叻陶寶」四歲仔季內八戰，取得一冠一亞一季成績，看上仗練者入紙再報谷草千二，改配雷神臨場打到兩倍熱透開跑，結果入直路力策下反應凌厲，結果壓倒「有醒」掄元，拚後小休再作備戰，埋門由韋達出試勁力貫注，今仗乘勇再爭此程，坐位望贏無難度。
金匯龍華紹仔搏盡
第七場、第三班、一六五○米。「金匯龍華」自從大前仗喺潘頓胯下於谷草一哩大勝開胡後，打後兩戰同程共獲亞季各一，看上仗配雷神捧成廿一蚊大熱開跑，結果跑軟地表現平平只跑第三，今回續攻拿手途程，改配擅長騎領放馬嘅蔡明紹執韁，排埋黃金一檔集有利條件於一身，只要交出一貫水準，當可為騎者取得復出後首捷。
第八場、第二班､一二○○米。「真先生」四歲北半球馬季內表現愈戰愈勇，喺二月份角逐三班谷草千二，喺羅理雅胯下後上爆出廿七倍冷W，打開在港勝門；贏馬升回二班後，至前仗由蘇狄雄再爆一W；上仗轉爭田草千四，臨場掛淋地牌，換上郭能再追入大冷P，打仔馬質新當起，今仗復爭谷草千二強項，具拚勝實力。
|
放大圖片
