 放大圖片
現時練馬師龍虎榜之爭，跑完一日賽事，可能經已唔同排名，好似上次夜賽咁，當方嘉柏連數三場之後，扒過蔡約翰頭，以為追貼大摩，落後三場頭馬，未來日子，佢會係大摩心腹之患，點知再跑多次日賽，形勢又改變咗，大摩起個孖寶，相反方仔就交白卷，但呢個時候蔡約翰立刻數番三場頭馬，過番方仔頭，繼而逼番近大摩，現今蔡約翰只落後大摩三場，方仔就落後四場。呢個禮拜三夜賽，方仔強兵列陣，擺明車馬又想好似上次夜馬咁連場數胡，唔好話追近大摩，起碼要過番蔡約翰頭，咁先至有機會進一步威脅大摩。方仔呢批列陣馬中，最具勝望就係嗰隻「執到寶」，當大家以為佢跑谷草千二米戰績唔係咁突出嘅時候，咁就真係要多睇呢隻馬兩眼。「執到寶」上場第一次跑谷草千二米，表現麻麻，得第十名，輸俾頭馬「叻陶寶」三個幾馬位，但大家只要睇一睇呢場「執到寶」排個十二檔，仲係第一次角逐呢個路程，基本上已打定輸數，但所輸並唔係咁遠，經已證明隻馬跑谷草千二米必定合適。再睇馬房部署呢場谷草千二米捲土重來，基本上「執到寶」最擅長是田草千四米，上周日經已有得跑，但方仔唔同佢出戰呢場合腳法嘅千四米，卻派隻跑姿仲好生硬嘅「彩耀滿堂」出戰，足可證明「執到寶」係一心部署再跑呢場谷草千二米，今次抽到七檔，比起上賽排最外檔肯定好跑得多，環顧對手亦唔算太強，只要跑出應有水準，大有機會征服窄場。
|
放大圖片
