獨有消息：行星進步出頭在望

放大圖片

今季李易達成績大有進步，除本身努力外，楊明綸都係功臣之一，雖然佢宜家經已係大師傅，但下午一有時間，即返馬房幫手，試想一下，假如馬房多個騎師操馬，成績唔好至奇。當然，先兩季楊明綸都係一樣咁幫手，但倉主可能見成績唔理想，有時搵綸仔操好嘅馬，經唔起壓力考驗，為穩陣起見好多時都會用過江龍跑，但效果唔係咁理想。今季楊明綸操好嘅馬，經常搵綸仔跑番，結果效果相當好，好似今次喺第七場草地二千米列陣嗰隻「永常勝」咁，季內兩仗勝仗全由綸仔包辦，今次呢隻馬升上四班，基本上呢對人馬組合屬機會分子，即使唔多作介紹，大家亦識得捧場。不過，同日李易達仲有一隻馬交俾楊明綸披甲，大家一定要打醒十二分精神，呢隻就係出戰第四場五班千八米泥地嘅「行星」。「行星」對上一手嘅練馬師係沈集成，但呢隻馬前後跑咗兩季，先後出賽十七仗，全為三零部隊，最近轉投李易達馬房，由達哥接手後頭一仗係跑泥地一哩，得第七名輸五個幾馬位，走勢唔係咁突出，就係因為呢仗泥地表現唔係咁突出，馬房曾經一度考慮俾隻馬提早抖暑，等下季至從長計議，但當馬房有咁打算嘅時候，隻馬近三個禮拜課課快工夫由楊明綸操，點知愈操愈好火，最後成隻馬狀態突然一百八十度轉變，係變好嗰隻，於是練馬師同馬主商量，決定跑埋呢場至算，今次角逐千八米更合隻馬發揮，睇嚟可以趕上尾班車，贏番場頭馬至抖暑。