 放大圖片
■洪永城與陳展鵬比賽拗手瓜不分勝負，和氣收場。
香港文匯報訊（記者 梁靜儀）洪永城（Tony）與陳展鵬近日傳出因拍《張保仔》鬧不和，昨日二人再次同場出席宣傳活動，展鵬更連番針對Tony，接受訪問時更講到明想打Tony：「我就來想打佢，咁招積。」對此Tony就表示會練定大聖劈掛去迎接對方，火藥味甚濃。
洪永城、陳展鵬、陳凱琳（Grace）及傅嘉莉等 昨日出席新劇《張保仔》宣傳活動，之前盛傳展鵬與Tony因拍該劇鬧不和，現場展鵬亦多次針對Tony，當大會播放劇集主題曲MV時，而Tony見到自己在大屏幕出現時，即發出歡呼聲，展鵬就取笑他說：「邊有自己嗌㗎？」之後Tony與Grace玩遊戲要扮人工呼吸，Tony即一手將Grace攬入懷，之後Grace起身又用水淋Tony，司儀就說：「要話畀鄭生(Grace男友鄭嘉穎) 知。」而展鵬就插嘴說：「戲入面就算啦，現場都咁，人家阿爸阿媽在此！」 玩完遊戲後，展鵬與Tony比賽拗手瓜，蔣志光就用大紙牌遮着兩人的手，但從側面睇到最後是展鵬拗贏，到蔣志光拎開紙牌時，展鵬與Tony則不分勝負，和氣收場。
自爆教傅嘉莉做戲
事後問到展鵬是否有心讓賽？他說：「咁我係佢前輩，玩啫，多些後浪係好事，最緊要推到我上岸，咁我就唔使做。（畀說話Tony聽？）又唔係，跟返Tony個 tone啫，佢平時比較現代。」他又自爆平時Tony叫他做鵬叔，問到是否嬲Tony這樣稱呼他？他說：「唔嬲，我個侄都係叫我做阿叔，（當Tony係侄？）開頭佢叫我鵬哥，但呢行得一個鵬哥，就係盧海鵬，咁佢就叫咗我做鵬叔。」劇中展鵬與Grace及傅嘉莉都有親熱戲，不過展鵬只記得與Grace有咀戲。問到傅嘉莉可覺得展鵬和Tony有火藥味？她笑說：「劇中囉。」展鵬卻帶笑說：「係真㗎，我就來想打佢，咁招積，不過就快，過多一、兩個星期就打。」他又自爆有教傅嘉莉做戲，以為向她施壓力會令她喊，豈料她卻喊不出來。問到他又可有教Tony做戲？他冷笑地說：「他哪用我教呢？佢同我拍埋呢套已經第四套，如果咁都吸收唔到學唔晒，大家交流唔到，好難再上，佢來緊都做主角。」
攬Grace唔怕鄭嘉穎會嬲
Tony對於展鵬笑言打他就笑說：「好呀，我練定大聖劈掛去迎接佢先。」說到他們在台上互窒，Tony表示其實只是搞氣氛，亦不覺得展鵬對他有不滿。雖然展鵬聲稱沒有教Tony做戲，但Tony卻稱展鵬有教他做戲，更給了他很多意見：「佢咁資歷深，有唔識都問佢。」二人似乎不夾口供。說到展鵬表示不敢教他做戲，又指他已拍了四套劇，若吸收不到好難再上？Tony聞言強笑說：「咁惟有我返去慢慢練習，希望下一套同佢碰吓，咁佢唔好再教我！我同佢鍊過，如果真係輸咪輸囉。」問到覺得二人哪個演技較好？Tony不諱言當然是展鵬好，因為綜藝節目對方不夠他來。Tony又否認叫展鵬做「鵬叔」，他表示叫對方做鵬鵬，對方就叫他城城。至於剛才在台上攬住Grace，可有怕Grace的男友鄭嘉穎會嬲？Tony說：「鄭生都唔小器，（Grace的父母唔鍾意？）我都識Grace媽咪，見過幾次，之前在橫店外景都有傾有講。」
|
放大圖片
