 放大圖片
今季跑咗十五次賽事，呂健威馬房目前有十場頭馬在手，倉主對呢個成績，喺季初目前呢個階段經已滿意，有馬主更趁呢個禮拜三冇夜賽日子，安排咗三圍慶功宴喺三門仔，據講有關馬主仲以貴魚「三刀」招待倉內各手足。除一批馬房手足獲得邀請出席外，騎師之中，梁家俊、蔣嘉琦及何澤堯都被邀請出席。雖然上述三位本地小將，季內未贏過呂廄任何一駒，但都有幫手操馬，可以話係幕後功臣，所以倉主及馬主都樂意邀請埋一齊熱鬧一番，雖然梁家俊季內未替呂廄馬建功，但呢次日賽列陣四班一哩嘅「龍之欣」，馬房專登搵佢上陣，希望憑佢近期手風大順嘅旺氣可以帶挈呢隻馬贏番次。
喺梁家俊與何澤堯坐副練洪國興架車入三門仔前，興叔下午安排咗「龍之欣」及「勁飛揚」分別由梁家俊及何澤堯喺馬房地堂踱步，兩隻馬踱嚟最好火氣係「龍之欣」，當梁家俊踱完呢隻馬後，興叔又同佢喺欄邊密斟一輪，相信話題不離教佢點樣騎呢隻馬。事實上，「龍之欣」上季兩勝都係贏谷草一哩，今季一出，馬房即安排番呢隻馬出戰最佳路程谷草一哩，並由最佳拍檔楊明綸操刀，但跑唔出水準，跑第十名輸六個幾馬位，翌日呢隻馬被驗出腳痛，所以落敗有跡可尋，不過，呢隻馬小休兩日，立刻恢復操練，且近期越操越辣，健康顯然冇問題，當然有馬迷會考慮到為何不再用楊明綸這個最佳組合出擊。據悉，只是因為李易達嘅「駕善」一早搵咗楊明綸幫手，由於師傅出到聲，亦一早搵定佢，「龍之欣」唯有割愛，馬房用梁家俊上陣，也是貪俊仔近期搏殺手風順，尤其谷戰最得意，早前嘅「錢照收」及「上浦猛將」，都係梁家俊力挫大師傅的招牌貨，今次「龍之欣」大可在其胯下重啟勝門，所以大家千祈咪以為「龍之欣」屬賣剩蔗嘅馬。
|
放大圖片
