|
上周日第八場二班千四米，呂健威馬房初出馬「瑰麗傳奇」，此駒在楊明綸胯下跑第九名，如果馬迷仲有少少印象的話，應記得去年四月舉行澳洲打吡越洋轉播日，有一匹叫做「史詩傑作」，結果在香港冠軍騎師莫雷拉胯下跑第七，而「卓爾」系馬主文壽強先生就以一千三百萬元高價引入「史詩傑作」，改名為「瑰麗傳奇」。講起呢匹馬其實有個小故事，本來文先生睇中當日跑季軍的「福定來」，仲開到港幣二千萬以打動馬主，無奈最終羅致不成，所以將收購目標轉到「瑰麗傳奇」身上，起初運港馬主文壽強替愛駒命名時，曾經鬧過小風波。事關馬主一向以「卓爾」作系列式命名，但呢次佢申請把新血命名為「卓爾傳奇」時，卻不獲馬會批准，原來馬主旗下有間公司以「卓爾」為名。按馬會規定，唔可以藉馬名為自己作商業宣傳，所以「卓爾」冇得再用，馬主唯有將「卓爾傳奇」易名為「瑰麗傳奇」。睇返「瑰麗傳奇」血統，「灌木叢」子嗣向來氣量十足，同父馬如「凱倫之寶」、「紅白」、「海洋活力」等等皆贏過二千及二千二百米，有理由相信「瑰麗傳奇」日後可向長途賽事發展。上次周日初出千四米確實嫌短多少，甚有熱身味道，估計稍後加程至千八米將可露出真面目，為馬主或者呂健威寫下一段史詩式賽馬故事。
|
