|
上周日冠軍騎師莫雷拉騎足十一場，隔夜騎師王彩池開飛成為一面倒大熱門，可惜最後成績不似預期，埋單僅得兩亞兩季，長勝纜躉亦告被打斷，翻查今季跑過三十八次賽事，莫雷拉除停賽及一次航班延誤合共缺陣共七期外，只得季初九月九日谷草夜賽無進帳，直到上周日才再一次頭馬數字係零。莫雷拉在剛戰竟然一場頭馬都贏唔到，亦係佢繼今季谷草揭幕戰後，再次全日食白果。唔知係咪想專心反擊，雷神竟然無趁周中無馬跑的空檔外遊兼避寒，反而留港一心操馬，就知佢對今次周日沙田一戰有幾大決心。
其實難怪莫雷拉有此諗法，原來周日田草採用A加三欄係佢福地，對上一次用呢條跑道佢豪奪六場頭馬認真誇張，分別憑「喜威威」、「連利進寶」、「開心遊戲」、「人民武士」、「鈦金剛」及「澳斯卡」贏馬，另外亦取得兩亞一季軍，當中「彩福」更只是輸頸位之微，今次周日賽事雷神一早卜滿坐騎擺明搏殺。
在董事盃及百週年紀念短途盃呢兩場大賽，雷神分別夥拍「詠彩繽紛」同「幸福指數」兩匹牌面馬上陣，前者屬田草千六米專家，以本身忠心性格相信是匹坐位望贏分子；後駒乃應屆香港短途錦標得主，經該役後養精蓄銳對準拿手路程而臨，有權再捧一盃。
|
