 放大圖片
■楊怡左手無名指戴上閃爆婚戒。
香港文匯報訊（記者 吳文釗）恭喜!恭喜!羅生及羅太結束成婚之旅返港，說的正是上星期二於英國古堡註冊結婚的楊怡及羅仲謙。兩人昨日由英國飛返香港，心情大靚於機場笑晒手拖手接受傳媒祝福。謙仔當着記者面前錫太太額頭兩下之餘，又發表冧爆宣言：「我點解揀英國呢？因為我鍾意當地古典氣氛重，同埋我希望太太好似公主咁出嫁。」
楊怡同羅仲謙昨午現身機場，吸引半百傳媒等候。穿上黑皮褸戴太陽眼鏡的楊怡，見傳媒即開心揮手，左手無名指戴上閃爆婚戒，二人合作地企定定讓記者影相。問到點樣求婚，楊怡大反應話：「喂，私人嘢唔好講。」謙仔話俾返少少浪漫空間他們二人，再追問係咪今年求婚，楊怡說：「今年啦，今年之內。(一次就應承？)呢啲就唔好講。(戒指幾多卡？)呢啲嘢幾多卡唔緊要。(事先知對方求婚？）唔知！（有冇喊？）有的。」問到佢事前知唔知謙仔會求婚？楊怡話唔知，謙仔聞言則笑謂：「俾佢知道咪好失敗！」訪問中，謙仔輕輕搭住楊怡膊頭，謙仔更多次說：「我太太」十分Sweet！
否認已懷孕
謙仔透露是今年向楊怡求婚，但未有透露求婚過程。楊怡和謙仔直言希望今次婚禮留給自己一個甜蜜回憶，楊怡說﹕「今次想有個完美回憶。」問到是否因有咗而趕秘婚？阿怡笑說：「未呀，咁爆？我今日條腰得22吋。（過去影結婚相定註冊？）兩樣做晒。」問到是否英國註冊，謙仔再冧爆接話：「其實想俾太太有個好好的回憶。（呢個地方有特別？）我因為鍾意古典氣息重，亦希望太太似公主出嫁。」楊怡聞言即表示多謝，記者再問楊怡是否自覺似公主，楊怡謂：「好好呀，天氣好好呀。」再追問費用，二人異口同聲表示唔重要，謙仔再補充：「佢開心就OK。（一行幾多人？）十零個左右。」
避談和TVB續約
問到楊怡習慣被叫羅太未？她說：「唔好咁叫我，要擰轉面。大家唔好咁嗌我！（婚禮有咩愛的宣言？）我註冊時講英文，我驚會甩漏，所以唔講，IG淨係ＦＯＬＬＯＷ佢已經夠。」謙仔謂返港會再擺酒，未有確實日期，但唔會在圍村擺酒。
至於有指謙仔向公司講大話隱瞞婚事，謙仔指年初已同公司講過有成家之意。楊怡亦稱公司對婚事沒有施壓，問到係咪TVB就快約滿？阿怡表示：「現在傾緊。(成數大？）我好肯定今年會擺酒！（唔續約生B？）唔係，冇咁快，我其實唔係好急。」問謙仔是否想盡快生B，他笑說：「太太都唔急，我急咩呢？」問到有冇傾過相關話題：「呢啲係好順其自然的事，一切隨緣。自己年紀唔算大。」之後，記者起哄要求謙仔錫楊怡，謙仔最終錫咗楊怡額頭兩下，二人受訪完畢後隨即手拖手移步至停車場，甜蜜滿瀉。
|
放大圖片
