大摩上次日賽憑「喜蓮獎星」捧走精英碟，佢接受馬會主持人賽後訪問，話未來日子依然會大步向前，即使去到七十歲硬性退休之年，仍希望贏幾百場頭馬，要知道練馬師唔同騎師，騎師可以出足咁多場，場場揀馬騎，好似莫雷拉咁，每季贏百零場絕對唔係難事，但練馬師擁馬得六十隻、而且唔係隻隻有得贏，一季要贏七、八十場經已好難，如果大摩去到退休前要再獲幾百場頭馬進帳，真係每季要贏番呢個數先至得。今季到目前為止，大摩只得四十九場頭馬，能贏到六十場經已唔錯，所以今季要贏七、八十場已經係冇可能嘅事。不過咁，大摩咁有雄心壯志，季尾階段依然唔可以輕視之。
好似今次旗下所派戰馬咁，呢個馬房所出嗰隻「壯思飛」（圖5號），上次由莫雷拉出戰千四米，輕取「太陽喜喜」及「辣得很」贏馬，大家睇一睇，「太陽喜喜」再出贏「精氣神」喺田草千八米，「辣得很」再出贏千四米，而且係話咁易，所以「壯思飛」呢場頭馬水準係非常高，今次馬房同佢出戰田草千六米，呢個路程前次跑得第三名，輸俾「貝連利」及「勝飛」，不過當時係跑黏地，根據呢隻馬外地成績，贏過沙膠地千五及千六米。濕軟地跑過兩次，一次好軟地，另一次軟地，分別輸七個半身位及九個身位，亦即係講呢隻馬跑變化場地係麻麻哋，所以千六米輸俾「貝連利」同「勝飛」呢一仗，主要係輸場地，並唔係隻馬唔夠人跑，起碼大家知佢外地贏過沙膠地千六米，當有足夠韌力。再者，呢場雷神連「東方快車」都唔揀，如果計賽績，當然是後駒贏晒，莫雷拉肯騎，是絕對有權揀「東方快車」上陣，但最終莫雷拉選擇替隻新勝嘅「壯思飛」扳甲，由此可見，呢隻「壯思飛」今次嘅爭勝機會肯定高過「東方快車」，值得大家一捧。