■《多啦A夢：新•大雄之日本誕生》劇照香港文匯報訊 咁多年來，多啦A夢每年都準時在大銀幕同大家見面，今年又點會例外！今年8月4日，多啦A夢、大雄、靜香、胖虎同小夫將會帶你穿梭時空，返去遠古時代見證日本的誕生，仲有一班好得意的小神獸陪你周圍闖蕩添！電影已經係系列中的第36部劇場版動畫，係1989年作品《大雄的日本誕生》的重製版本。呢部作品當年創下420 萬的觀看人次紀錄，直至去年先被《多啦A夢》另一系列作品《STAND BY ME多啦A夢3D》打破，可想而知呢部作品係幾咁受歡迎！動畫早前率先在日本上映，反應叫好叫座，輕鬆奪取連續3個周末票房冠軍，並創下2D多啦A夢電影票房最高紀錄，累積票房更突破40億日圓！
今次故事講大雄同朋友決定來一次史上最大規模的離家出走，在多啦A夢幫助之下，他們乘搭時光機去到7萬年前的日本，即係地球最後的冰河時期，打算在呢片原始國土發揮小宇宙。他們利用各式各樣的法寶建立起夢想家園，仲養咗幾隻好得意的小神獸。正當大家享受自由自在之際，卻有人突然掛住屋企，大家只好先返回現代。同時，來自遠古時代的光族少年高高路，因為時空錯亂嚟到大雄屋企，剛從古代返嚟嘅大家，竟然喺現代巧遇真正嘅古代人！後來得知高高路的族人被黑暗族擄走，大家決定幫手對付黑暗族首領──不死精靈王吉加桑比。查探之下，大家發現敵人竟然係來自23世紀嘅時空罪犯，妄圖統領世界，改變歷史，連來自22世紀的多啦A夢都冇晒符。
印花
洲立電影現送出《多啦A夢：新•大雄之日本誕生》優先場戲票20張予讀者，有興趣的朋友請剪下文匯報印花，連同貼上$1.7郵票的回郵信封，信封面請註明「《多啦A夢：新•大雄之日本誕生》戲票」，寄往香港仔田灣海旁道7號興偉中心3樓─《文匯報》，數量有限，先到先得，送完即止。
日期：7月30日(星期六)
時間：中午12時
地點：新光戲院