■羅家英出席《粵劇新星展II》拜神活動，透露將一連六日到來監場。香港文匯報訊（記者 梁靜儀）阿姐老公羅家英昨日以藝術策劃的身份，到高山劇場出席《粵劇新星展II》拜神活動，而一連六日的演出他亦會到場監場，之後又要投入與太太汪明荃合演的粵劇《蝴蝶夫人》綵排。談到阿姐快將生日，問到時會如何慶祝？家英哥笑指阿姐的新曆及農曆生日他也很忙要排戲，只在下午有空檔跟她慶祝，他說：「已約阿姐中午食餐飯慶祝，(會否有驚喜？)老夫老妻有咩surprise？唔送禮物喇，送都畀賊偷晒！（送夾萬囉！）佢有啦，(送火鑽？ ) 佢有陰影，大家講明唔好送禮物，畀自己壓力好煩，平時睇到有適合就送，手袋、心口針、鑽石、手鏈、耳環好多嘢都送過，（送層樓？）我就冇咁多錢，又無這需要，慳慳地食餐飯好，初戀就話送多啲嘢。」
家英哥又笑謂阿姐唔好鬧他咁多就好了，問到他最近可有被阿姐鬧？他笑謂近日少見面所以少鬧了，但好快就會鬧：「佢問我間屋係咪有鬼？有針拮？成日不在屋企，去做嘢啦，男主外，女主內，她在TVB ，我要返內地拍嘢。」他謂平時最多都是與明星足球隊去踢波，而高爾夫球已經九個月沒有打了。
剛從布拉格拍戲返港的家英哥，表示買了一個百多元的水晶指甲銼送給阿姐，笑說：「好貴㗎，阿姐收到都話好需要，(生日禮物？ )手信加生日禮物。」