■黃芷晴香港文匯報訊（記者 梁靜儀）黃芷晴昨日穿上吊帶裙出席apm活動，並呼籲大家捐出舊教科書，送贈予基層家庭小朋友之用。被指頻頻性感亮相的芷晴，聞言即拉一拉衣服說： 「今日冇咩線睇到，純粹襯返個活動佈景。」她坦言男友有時都會話她的衣着，但工作就沒所謂，有時她穿露肩裝，男友就會叫她小心凍親。問到她是否經常睇書的人？芷晴坦白說：「自己通常睇有圖畫的書，睇太多字會眼瞓，加上自己讀設計，鍾意睇插畫，我鍾意睇幾米，一幅畫加幾句有意思的文字。（可會亦想出一本？）我驚圖文不符，自己寫嘢唔叻，最多都係引用別人的歌詞，但我想出手作書，諗緊點樣至唔會咁悶，或者加上自己旅行的相，同埋我好鍾意用動物做靈感，希望下年書展出到。」
芷晴透露五年前讀大學時曾出過一本關於大澳的書籍，當時自己一手包辦影相及插畫，她說：「那時同男友剛分手，父母陪我去咗三四次大澳先完成。（點解揀大澳？）因為一直都想同另一半去，覺得啲排屋好靚，加上讀書時愛上攝影，想寫本旅遊書，但又冇budget，所以揀咗呢個地方，不過現在仲未同男友來過大澳。」每年都會盡量抽空跟家人去旅行的芷晴，正計劃九月請父母去旅行，地點會是東南亞。