■鍾欣潼以友情價幫好姊妹蔡卓妍拍戲。香港文匯報訊（記者 梁靜儀）電影《原諒他77次》昨日於九龍灣舉行開鏡禮，除蔡卓妍(阿Sa ) 、鍾欣潼(阿嬌)、鄭希怡（Yumiko） 、周柏豪、及雷琛瑜（J.Arie）、盧巧音(Candy )、衛詩雅及C君等演員出席外，英皇集團主席楊受成亦有到場支持。昨日拍攝一場新娘子J.Arie在台上拋花球的場面，飾演姊妹的Yumiko、阿Sa、Candy及衛詩雅齊齊搶花球，之後Yumiko成功接到花球，但她極速將花球塞給身旁的阿Sa，更大爆對方多人追。
在台下睇熱鬧的阿嬌就用手機拍攝搶花球的過程，更說： 「我唔會再接花球，雖然係假。」事後阿Sa與阿嬌一起接受訪問，當記者恭喜阿Sa接到花球，她就笑說： 「幻覺來，明明唔係我接到。」阿嬌就笑她的幻覺好真。問到阿Sa可接受Yumiko的好意？她說：「四個人搶花球有兩個已經係人妻，得我同衛詩雅唔係。（大家好想你拍拖？）好呀，多謝大家。」
阿嬌表示已接過兩次花球，為免嫁唔出不會再接花球：「聽聞接了半年唔嫁就三年都嫁唔出，我接過兩次，時間洗禮得差唔多，唔可以再接。」阿Sa聞言即緊張說：「我那個(花球) 係假，懷疑Yumkio害我。」
阿嬌否認心急拍拖
單身的阿嬌日前出席活動時公開表示歡迎異性追求自己，可惜至今仍未有人行動，她笑說：「講咩，你估搵條題好易？咁多份報紙賣廣告好貴，唔好浪費！」問到會否叫阿Sa介紹男仔？阿Sa稱自己都未搞得掂，隨緣吧。說到阿嬌心急拍拖？阿嬌即否認心急拍拖：「老闆之前問我有冇男仔追？我答冇呀。（老闆有個仔楊政龍？）佢好細個，人家咁忙，老闆都叫我唔好，佢話我會傷心。」阿Sa又叫大家不用擔心她與阿嬌的感情事：「Mr.Right坐車來緊，(坐電車？）電車都係車，電車都有總站，仲可以捉Pokémon。」阿嬌又稱若搵到真命天子不介意閃婚，但要先相處了解足夠。問到是否要觀察很多年？她說：「觀察一年幾就得，自己Plan好晒又點，人家唔娶。」
阿Sa今次不僅參與演出，更有份一同創作故事，並找來多位好朋友演出，其中更有她的幼稚園同學。至於阿嬌被問到演出酬勞？她笑言只收利是，講錢失感情。戲中飾演書店老闆娘的她造型相當搖滾，更要駕電單車。
Yumiko親教女兒跳舞
同場的Yumiko被問到將花球塞給阿Sa，是否想她早日拍拖？她說：「都想身邊人幸福，我要(花球)做咩？咪畀人鬧。」問到她可有介紹男生給阿Sa？Yumiko大爆阿Sa多人追：「我邊有好男生介紹，阿Sa大把人追啦，咁靚女。」當問到她是否知道內情？她即封口唔講。再問到是否見過阿Sa的追求者？她繼續避談說： 「沒見過，咩都唔會講。」
問到她開工時可有掛住女兒梁子柔（梁浸浸）？她說：「我今日(昨日)煞科，阿Sa好想見梁浸浸，睇睇有冇辦法帶來探班。」她又透露女兒見到她出門返工，不單沒有喊更表現得好開心。梁浸浸快將一歲半，Yumiko透露近日親自教女兒游水及跳舞，日前電視重播她的電影，女兒都認得她並指住電視嗌媽媽。