近季大家每逢聽到「美麗」系賽駒，定必想起掌舵人郭少明先生，亦即係莎莎國際老闆。「美麗」系馬剛季可謂大豐收，不過最威唔係郭少明個人名下賽駒，反而其太太郭羅桂珍贏馬最多。郭羅桂珍名下愛駒剛季表現突出，拍賣馬「變出美麗」四勝至叻、「美麗大師」兩捷、「美麗皇者」趕上尾班車於煞科日開齋。反而郭少明個人名下「美麗之星」剛季只取得一場頭馬，就連囡囡郭詩慧名下「愛美麗」兩場頭馬都比不上。不過，其實冇需要咁計，郭少明係「美麗」系掌舵人，邊隻馬贏佢都咁開心，而且可一家人入馬場享受家庭樂，呢一樣先係最重要，展望「美麗」系新血之中，以「美麗出擊」前景最樂觀，此駒在英國跑過兩仗千四米，首戰贏出兩歲處女馬賽，再出三級賽以短頭位僅敗得季軍。查血統，父系曾贏英國二千堅尼，千四至千六米強項，母系馬則初當種馬，本身曾贏千四米膠沙地，「美麗出擊」是首胎產品，推算擅中距離偏長馬。
「美麗出擊」上季插班評七十八分，開操循序漸進例課不缺，早期試閘入閘有麻煩，表面觀感遠離水準，但六月尾正式上陣，雖然落敗，但全程並不脫節而且腳法不差。總括此役冷人冷馬跑出後列名次，隨時是為今季爆冷鋪路，告東尼訓練此系馬必有交代，預計三歲馬適應環境後進步理想，評分離開三班重磅區域便要提防。