作為香港最大馬主蕭百君（圖右四）家族，剛季戰績算係合格，整個家族合計贏九場頭馬，包括掌舵人蕭百君名下「勢必跑」三場頭馬與「聰明才智」趕到尾班車得一Ｗ、蕭劍新「澳斯卡」兩勝及「醉必勝」一捷、蕭劍平「雲呢拿」一捷，而家族的團體馬「銀飛龍」亦有一場頭馬交出。展望在新的一個馬季，蕭家依然有大把籌碼喺手數胡，包括蕭百君未曾上陣嘅愛駒「達羅素」，而蕭劍平V404及蕭劍瑩「卡達星」來頭也不小，尤其後駒貴為一級賽德國打吡殿軍，估計這駒經上季兩仗汲取實戰經驗兼適應水土，於今季應該有好表現交出，大家記得嘜實佢。
作為全港養馬最多嘅家族，蕭家軍嘅招牌紅黑直間綵衣，近期開始遍布全球，好似名下Stormy Antarctic曾在法國尚蒂伊馬場角逐千六米一級賽莊柏德大賽，結果以兩馬位距離不敵貝諾華坐騎Zelzal，取得一席亞軍，表現絕不失禮。Stormy Antarctic至今九戰得三冠兩亞兩季，呢匹三歲蕭家軍最近一役挑戰一場法國一級賽傑克莫華大賽，呢場G1曾造就唔少經典，好似「金剛威」、「杜拜威」、「杜拜千禧」甚至日本馬王「大樹快車」都贏過呢場賽事。雖然最終Stormy Antarctic只獲第七名，但所負距離並不遠，論賽事水準亦相當不俗，展望未來交出更佳成績。