梁家俊上季取得三十三場頭馬，屬從騎以來最佳成績，佢希望今季能夠更上一層樓，除了提升頭馬數字之外，更會力爭在各項頂級大賽尋求零的突破。梁家俊出道八季，合共十三次角逐國際一級賽或本地一級賽，不但與頭馬無緣，甚至乎連三甲都未入過。
今個暑假，梁家俊公私兩忙，既要搞婚事，又要到英國客串，幸好英國之行有新婚妻子阿Kit陪同，代為打點一切。梁家俊表示：「今次英國之行透過錢健明及高伯新的介紹，得到當地練馬師張仕頓和顧偉堯給予支持，雖然坐騎唔多，但起碼今次建立好一定人際關係，我有信心明年暑假重返英國客串，應有更理想的成績。」
明日開鑼戰，梁家俊有九匹坐騎，當中有多匹極具爭勝機會之實力分子。在重頭戲香港特區行政長官盃，梁家俊得到徐雨石支持，將夥拍「神舟小子」爭盃。梁家俊說：「上季曾策騎『神舟小子』出戰路程千二米的國際一級賽主席短途獎，該役由於排在十檔起步，大部份途程要走外疊，形勢極之不利，所以落敗不能作準，今季較早前策騎牠在沙田草地試閘，雖然在較後位置而返，但走勢不錯，經過試閘後再操磨，狀態進一步提升，今場賽事雖然各匹對手均實力甚強，但牠並非沒有機會，以目前狀態，加上有一檔之利，是有爭入前列機會。」
去季新馬出賽五次均由梁家俊策騎，贏得兩場頭馬的「怪獸家長」，今仗在田草三班千四米作季內首戰，梁家俊說：「隻馬質素唔錯，對本地水土適應很快，季尾兩仗雖然勝出，但尚未完全成熟，憑質素搭夠都有咁好演出，反映到是一匹好馬，新馬季在晨課上策騎牠出操，表現甚佳，比上季更進步，今仗首次在三班參戰，但以牠的質素應該不會構成障礙，而且負輕磅有利，只要陣上沒有擠阻，交出應有水準，是有機會取得跨季三連冠。」
上季中轉投何良馬房出賽多次越跑越好，季尾最後一戰在田草四班一千米角逐，在梁家俊胯下打開勝利之門的「大收成」（圖14號），今戰在贏馬路程上陣，梁家俊對馬匹的機會分析說：「隻馬過往腳部曾有問題而影響進度，幸好養得番，較早前在泥地試閘走勢甚佳，狀態比去季贏馬時更佳，希望可以贏得跨季孖寶。」