今晚谷草安排八場夜戰，以B欄C彎作賽，頭場晚上七時十五分開跑，重頭戲為公益金盃編在第六場。馬房方面，沈集成於開鑼日起孖，今次谷賽亦布下強陣，值得優先留神，另外方嘉柏、鄭俊偉及霍利時均可注意。騎師方面，雷神手執不少惡馬，當要重視，半冷可吼吳嘉晉。
第一場、第五班、一二○○米。「欖球鑽石」蘇偉賢六歲馬，去季初至中階段出爭谷草及田草短途表現止於接近，不過於五月份首次加眼罩競逐谷草千二即脫胎換骨，由潘頓操刀排五檔起步，出閘迅速擺前領放，就此輕勝對手兩馬位叩響勝鼓，配備效果相當顯著，暑期復課工夫齊備，初出對準勝途攻堅擺明車馬，值得秤先。
第二場、第四班、一二○○米。「勁飛聖」大前仗首次轉戰谷草千二改用前領跑法，僅以馬鼻位之微敗於忠心佳駟「越跑越好」，未出頭只屬欠運；接住再跑第二，只不敵另一準繩馬「星光大師」，這兩戰除證明本身谷戰性能突出之外，年輕馬演出亦開始連貫，踏入今季已完全納入正軌，這次再接再厲跑強項路程，戰意毋須置疑。
事必獲利已屆勝時
第三場、第五班、一六五○米。「事必獲利」上季尾轉投方廄所跑的三場都屬千二及千四米短途，根本不是此駒的射程，練馬師有此安排，相信是試探性質，而當中亦有一場跑到季軍，某程度上是拜班次有利、對手質庸所致，再看埋門試泥閘走勢省鏡，狀態已準備就緒，今次報回窄場一哩誓師，看來係郁手時候。
第四場、第四班、一六五○米。「超強快駒」上季轉戰谷草表現扶搖直上，先在谷草千二跑第三初次上名，打後增程谷草一哩，喺潘頓胯下慢放打響勝門；上仗易配雷神再爭此程，豈料起步慢閘下後上鞭長莫及得第二，打仔馬復課後操練循序漸進，埋門雷神考驗反應不俗，佳態已備，今仗再爭四班一哩路合，有力收復前失。
飛馬看花省靚招牌
第五場、第四班、一二○○米。「飛馬看花」五歲仔上季尾喺谷草千二米一放到底取得勝仗，加分後兩戰表現皆未如理想，演出比預期失望。歇暑轉投沈廄後成熟與日俱增，埋門由寶遜試閘走勢悅目，今回練者揀勝途再出發，當要盯實為宜。
第六場、第三班、一六五○米。「可愛寶」五歲仔上季十二戰取得兩W，首場頭馬喺谷草一哩取得，到季中曾於田草一哩及千八米上名，可見田草亦合發揮，而到季尾再喺谷草千八再下一城，而加分後兩爭田草二千及谷草千八都跑入Q腳，足可反映打仔馬正值黃金期，今仗磨利槍頭始列陣，初出競逐一哩，勿因縮程而掉以輕心。
第七場、第三班、一二○○米。「陀飛輪」姚本輝馬房T布打仔馬，上季初曾受傷影響進度，而練馬師花了大量時間落足心機打理，令健康情況回穩，在季尾階段取回一W，打後兩戰同程亦跑第四，而今季開操後仍然有正常打磨工夫，埋門由綸仔試田草大閘輕鬆跑入第三勇態未減，今仗角逐強項贏面樂觀。
第八場、第二班、一二○○米。「威力川」大摩V布早熟快馬，上季插三班初出田草千二，負重磅兼彎位勒避仍追回第三；前仗再爭千二，因排外檔起步關係，滇仔全程走大外疊，最後跑第八名而所負不遠，反映必有高質素；汲取兩仗實戰經驗，第三仗換史卓豐便飛到馬到開胡。而今季五歲正值大勇大熟期，初出揀窄場千二誓師，憑其銳利前速力足一拚。
