每逢季初階段好多外籍馬房都未熱身上力，好似上年成個九月大摩贏得一W咁大把，蔡約翰都只係三Ｗ，反而土炮全力搶攻，葉楚航上年九月狂執七場居榜首，而呂健威亦奪六場頭馬，至於徐雨石亦進帳五場排第四位，事隔一季，新馬季情況又似有倒模再來之勢，剛剛開鑼日十場，外籍馬房得賀賢贏頭場「四季勁」，反而徐雨石憑「紅牡丹」、「歷險家」及「快無極」三捷，另外沈集成有「永旺年年」捧特首盃及「阿甘」重開勝門，告東尼有「萬事欣」及「美麗皇牌」起孖，再加埋何良「怪獸家長」及蘇偉賢「飛星凱旋」，華倉共執九場。馬房季初搶攻與否，其實睇一兩次賽事就知八九，馬匹未催谷就係未催谷，真係無得拗頸，依情況梗係跟住贏開華倉最着數，沈廄「好運有利」上季與「永旺年年」一樣同為馬房勝出四場，上季尾一連兩仗增程失利，今番回師最首本谷草千二米有權一出即勝。
