告東尼搵得雷神上陣嘅馬，當然有料到，好似呢次尾場列陣隻「加州再豫」咁，上季雷神雖然騎呢隻馬喺千六米輸俾「曦世之寶」得亞軍，因為嗰場屬三班賽，馬匹需要適應期，幕後對佢嘅表現已收貨，故雷神季初一早向告東尼卜定，假如隻馬再度出賽，希望第一個會搵佢。果真告仔替呢隻馬報名立刻卜定雷神上陣，大家可以睇吓，同場有隻「駕喜」，雷神贏到滑晒，知道有「加州再豫」上陣，立刻連「駕喜」都推庄，可見隻馬幾咁受到雷神重視。
其實曾經替「加州再豫」贏過兩場嘅何澤堯，見去季雷神接手騎隻馬都贏唔到，於是向幕後希望取回策騎權，當然最後是不得要領。莫雷拉肯騎幕後自然求之不得，畢竟「加州再豫」經已升班上陣，所遇對手比起上季所贏嘅兩場四班賽強得多，假如有得選擇，當然會考慮用雷神呢類大師傅，因為隨時會將「加州再豫」嘅能力推向更高層次，所以短期之內，何澤堯要取回呢隻馬策騎權，相信都好難。
另一個幕後鐵定用莫雷拉嘅原因，除咗因為三班要面對較強對手外，今次幕後慶幸得雷神一早垂青隻馬，事關同場之中，姚本輝有隻「包裝騎士」列陣，呢一隻亦屬高質馬，假如跑落去，成就有可能會高過「加州再豫」都唔定，而且跑千六米呢個路程也非善男信女，不過如果是跑長途，或者係千八米以上途程，「加州再豫」就未必會係佢手腳。所以現階段幕後希望「加州再豫」強配在季初可以掃低呢類強手，待馬匹成熟更足後才向更長路程進軍。最後試跑日午間，「加州再豫」由副練巫偉傑，拍「幸運日」蔡明紹及「銀影大亨」助手，三隻馬喺機坪踱步，期間都係以「加州再豫」狀態最出色，睇嚟今次告東尼馬房大可憑呢隻「加州再豫」增添頭馬進帳。