姚本輝呢次日賽派出唔少實力馬上陣，如「包裝騎士」、「踏雪無痕」同埋「馬狀元」，賽前殺聲震天，不過以上述三駒嘅動態，「踏雪無痕」係最值得優先留意嘅馬。話說上月底，姚廄舉行季前拜神儀式，獲倉主邀請出席嘅馬主同騎師，最深刻係「踏雪無痕」馬主同黎海榮呢對，兩人喺馬房雞啄唔斷，話題當然離唔開「踏雪無痕」。今季第一炮安排隻馬跑最拿手千四米，更獲排二檔之利，可以話天助其成。
排位日即今周一下午，黎海榮兩點零鐘經已出現喺姚插A呢個時候，練馬師及副練當然喺度，原來馬房經已安排咗三隻馬喺地堂加課踱步，呢三隻馬，第一隻係「踏雪無痕」，另兩隻係「包裝騎士」談樹文及「馬狀元」梁家俊，由於黎海榮早到，呢三隻馬被安排三點鐘始喺地堂拍踱，將近三點鐘，先至見另外兩位騎者到場，但黎海榮經已急不及待，騎「踏雪無痕」出地堂，整個過程，「踏雪無痕」谷起雞公頸，馬身起晒梅花點，顯然呢個暑假幕後經已作過一番催谷，踱畢，黎海榮與倉主又細心睇馬身同埋馬腳，對呢隻馬嘅態度，相信連盲嘅都睇到係有幾緊張。「踏雪無痕」強項係跑千四米，但未必次次遇適合形勢發揮，事關佢都係一隻黑仔馬，有時馬匹有態，卻抽唔到好檔，呢次抽個二檔跑，有馬房口痕友同倉主講，贏咗五成，事關呢隻馬抽三檔以內跑千四米，前後得三次，成績係冠、亞及季軍各一次，咁準繩自然捧得過。