法國老將巫斯義上季以文家良馬房主帥身份在港策騎，雖然埋單整體取得十八場頭馬，成績不算太差，但是由於多次被罰停賽關係，故上季尾騎練雙方結束了賓主關係，而巫斯義亦未獲發客串騎師牌照，因此只好返回歐洲發展策騎事業。不過，這位大賽騎師似乎仍然心繫香港馬壇，上周三晚快活谷開鑼戰就見到巫斯義與前馬后「勝威旺」馬主蔡惠宏醫生一同入場，然後又與文家良、告東尼及方嘉柏等相熟好友密斟一段時間。據騎者透露，今次他返港主要是探望香港朋友，順道看看有否機會於季中階段再次回港客串，而他已於上周四飛回法國出賽。
另一方面，馬會最新一批新馬命名當中，比較特別為蔡惠宏醫生匹新愛駒，佢對上一匹名下馬為「好靚仔」，在上季退役之後蔡醫生終於有馬到港，但今次唔用「靚仔」命名，而係叫做「好靚女」。
另外，蔡醫生可能對前愛駒、前打吡冠軍兼馬后「勝威旺」仍念念不忘，所以最新引入呢匹雌馬「好靚女」，咁啱得咁蹺，上周三晚跑馬地開鑼戰，蔡醫生被睇到孖住騎師巫斯義入場，「勝威旺」在二○○三年贏香港打吡大賽，當時就係由巫斯義執韁，而佢亦曾為「好靚仔」贏得頭馬。巫斯義話希望季中能夠有機會再來香港客串，唔知到時有冇機會再為蔡惠宏醫生效力，兼替「好靚女」執韁呢，值得拭目以待。