■Twins前晚在佛山開唱，更一度感觸落淚。香港文匯報訊 「Twins LOL世界巡迴演唱會」前晚於佛山開唱，由廣州、深圳再唱到佛山，巡迴第三場，一樣座無虛席，氣氛熱烈。阿Sa表現得超興奮，演唱會完後更發現自己唱到聲都沙，而她之前幾場演唱會都是抱恙頂硬上獻唱，所以她也鼓勵正受聲沙困擾的鄭秀文（Sammi）不用擔心，更準備去紅館捧Sammi場打氣。
前晚Twins在佛山舉行演唱會，上次深圳場兩人在台上為歌迷獻上情深咀嘴後，佛山歌迷前晚又有樣學樣，不停叫她們「Kiss」，還有歌迷舉燈牌寫着「唔咀唔畀走」。不過阿Sa就推卻說：「上次咪講過，只此一次囉。又咀？唔好啦！來到佛山，不如我哋打女嬌表演一下『佛山無影腳』啦，來來來，我哋做一次葉問畀大家睇，哈哈。」不過阿嬌顯得有點擔心謂：「吓？真係踢呀？我唔捨得，驚踢親你喎。」阿Sa就大笑道，「我識避嘛，即管放馬過來。」繼而阿嬌起腳踢高到可以跨過阿Sa的頭，全場觀眾即時歡呼掌聲雷動。
而當Twins唱《相愛六年》時，阿Sa不知何解突然感觸落淚，阿嬌亦被感染哭了起來。
演唱會過後，阿Sa解釋落淚原因，她指《相愛六年》這首歌很催淚，她們兩人已經努力練過忍喊，本來已經有了免疫力，但可能是中秋，受月圓月缺影響，她也不知為什麼，望着阿嬌唱唱吓就忍不到了。阿嬌坦言見到阿Sa喊才淚崩，「最衰阿Sa喊，引到我都喊埋，兩個人一起相愛了十五年，唱到某些歌詞也一定會觸動的，無辦法啦。」
阿嬌爆起飛腳險跌低
問到中秋節如何度過，阿Sa謂自己去了跟朋友玩燈籠，阿嬌就說去練泰拳：「我唔想做健身運動咁悶，所以咪揀泰拳試下。剛剛開始咗兩三日，最初真係成身痛呀，因為每一個動作都係全身肌肉都會用到。但係剛剛喺台上，踢嗰腳，我其實好驚重差啲滑倒，因為我踢完踩到自己條紗裙尾，哈哈，差啲成個跌低。」
另外，談到鄭秀文於香港抱恙開唱，Twins都說有留意新聞，覺得Sammi好可憐，希望佢早日康復。阿嬌認為Sammi太瘦了，希望她多吃東西增肥增強抵抗力；阿Sa則準備去紅館睇Sammi為她打氣，並鼓勵說：「我覺得Sammi唔好擔心啦，唔使喊，觀眾入得場都係想見到佢之嘛，見到佢就得啦，唱成點觀眾都唔會介意。」問到兩人有沒有試過像 Sammi一樣病住開騷？阿嬌即說：「阿Sa咪係一樣！香港開騷前又病，廣州又病，深圳都病呀！」阿Sa認同道：「我今年都唔知點解抵抗力咁差，幾次開騷都急性咽喉炎。作為歌手真係冇得揀，病都冇計，都係要上台，個身體又識得上到台就自動死撐埋佢。」
笑指找吳尊投資文萊場
接下來，Twins還有上海，澳門等地方要唱，當兩人前晚做直播時，不少歌迷一直問他們會不會到重慶、成都、美加、澳洲或泰國等地開唱，甚至也有文萊歌迷邀她們到當地開唱，Twins就笑謂其實去哪裡也沒所謂，最緊要有歌迷支持。談到文萊開唱的要求，阿Sa 更笑道：「好呀，我都想去呀，咁不如打電話問下吳尊『會否投資我哋係文萊開一場？』，一係約埋佢一齊唱，哈哈哈。」最後Twins透露，會在上海站唱出全新國語歌，這首歌由林俊杰作曲，黃偉文填詞，非常勁，單是歌名就有12個字長，看來值得歌迷期待。