名牌馬販派斯今季一開波成績唔錯，經已交出三場頭馬，呢三場頭馬，兩場嚟自蘇偉賢馬房，分別係「夢幻仙子」及「添好運」，另一隻係蔡約翰馬房嘅「喜悅繽紛」，當然，由佢經手購入嘅馬，除呢三場頭馬之外，仲有啲入圍嘅，妤似賢廄隻「神威福將」、告東尼隻「英勇大師」、方仔「豪逸」及「豪勝」。
點解派斯喺馬主心目中受到咁大信任，信任佢嘅貨源係最大原因，就好似「豪逸」馬主咁，再入貨都搵返派斯幫佢揀隻「豪勝」，話時話呢隻「豪勝」初次上陣，表現亦唔差，相信好快會有馬贏。
派斯與幾位練馬師特別老友，其中一位係蘇偉賢，倉內唔少好馬，都係經佢手購入，所以暫時派斯所得三場頭馬，賢廄佔其二。今個禮拜六國慶日，蘇偉賢有隻初出馬，名為「龍騰馬躍」，一出就配雷神，呢隻馬上季經已嚟咗香港，亦係由派斯幫幕後購入，二月份開始喺晨課露面，四月第一課大閘已由雷神過檔，到六月初再由雷神試多課大閘，之後再於六月底由鄭雨滇客串一課大閘，諗住趕及季尾上陣爭功，但呢次大閘之後，足部健康出現問題，無緣上季賽事。隻馬抖咗大半個月時間，暑期重新料理，七月中機坪一開，即見隻馬踱步，未幾就進行正常打磨程序，九月二日雷神試課谷閘千二米得第二名，再去到九月十九日，又見雷神同呢隻馬試課田草千二米，仲贏埋出嚟，姿態非常討好，如果講狀態，真係可以喺呢場四班千四米一出即勝。一般初出馬，多數會在短途起步，大家睇一睇，同日之中，四班有場千二米都唔報，原來雷神上季經已授下錦囊，認為隻馬係中長途好馬，蘇偉賢當然心裡有數，所以第一戰，跑千四米係冇問題，大家信唔信呢隻質新馬咁犀利，唔信，屆時又睇吓宎鰡o幾透就知道冇花假。