大摩剛周三出兩隻馬，一隻「蓮花巨星」配潘頓，雖然冇乜狀態，但鞍上人肯騎，隻馬好鬥心，七八成水準仍衝入第四名，替馬主攞番七萬幾獎金，呢個都唔係重點，最緊要下次有交易，希望大摩繼續喼住隻馬俾潘頓騎，咁就唔止七萬幾咁簡單。又好似祈普敦咁，騎大摩隻「精氣神」，賽前冒雨試泥地大閘一課，輸到一條街咁遠，冇乜精神，雷神一早推庄，大摩搵祈普敦替隻馬熱身，雖然一早知道屬陪跑角色，但周一嗰日下午，祈普敦一早入大摩倉，借睇「精氣神」為名，立刻送秋波搵大摩支持，大摩當然識做，今次一口氣俾咗三隻馬祈普敦喺國慶日上陣，呢三隻馬就係「喜蓮獎星」、「飛龍駒」及「海翡翠」。除「飛龍駒」佢上次騎過之外，其餘兩隻都係第一次騎，兩隻馬雷神都試過閘，最後唔騎，會唔會雷神手指罅漏隻筍嘢俾祈普敦，咁又未必冇呢個可能，大家仲記唔記得呢位澳洲籍騎師曾經替大摩贏隻「駿馬翹楚」開齋，贏第二名隻「情趣」，後者鞍上人就係雷神。今次大摩三隻馬，「海翡翠」初插四班是龍是蟲唔敢講，但祈普敦獲得「喜蓮獎星」策騎權，咁就唔講得笑。同場雷神雖然揀「壯思飛」，呢隻馬上場大熱門仲輸緊俾隻二百倍大冷門「喜喜寶」，計跑千四米級數，並唔係咁高，呢次雷神超磅騎番佢，相信必有原因。雷神騎唔到，大摩惟有益番鄉里，錦標場合，大摩馬空群出動，從來不分正副選，大家咪以為「壯思飛」贏晒。