■容祖兒及李克勤大馬演唱會，羽毛球王李宗偉親臨捧場。香港文匯報訊 容祖兒，李克勤剛剛完成一連兩場的大馬雲頂演唱會，今次在雲頂兩人都遇上搞笑事，令他們對雲頂留下深刻印象。雲頂之旅，羽毛球王李宗偉親臨捧場，本來克勤想相約在大馬打波，但後來李宗偉撞了工作，所以只來看騷及一同慶功。克勤則相約對方，下次來港時打番場波。
李克勤表示沒想到大馬是熱帶地方，雲頂的十一月卻是英國咁凍，晚上跌到得幾度，克勤說：「我一向怕凍，去咁多次雲頂都未遇上過咁低氣溫，晚上睡覺，我凍到要問酒店拿了兩個暖風機入房開住先夠暖。不過開咗一晚暖風機之後 ，口喉開始有點乾，所以我又問酒店，請問你哋有沒有放濕機呢？酒店好好，搬了一個巨大的機器進我房個廳度，咁我綵排完之後，就用自己九牛二虎之力，搬咗好耐，將嗰部巨大機器推了入我個睡房，好安心咁等佢噴濕水氣出來。等咗個幾兩個鐘都冇動靜，我再去研究部機，係咪自己按錯制，先發現，酒店畀咗部抽濕機我，個一刻真係好暈，哈哈。」
祖兒遇酒店全能職員
至於祖兒，她就說：「我就遇上一個很特別的人。因為我帶去的電腦上網有問題，連不到線，於是我打電話請酒店幫忙，他們說會派一個電腦部的專業人員來查看，來了一位小姐，她細心地查看我的電腦，然後說了一堆我聽不明白的英文，當中我只是聽到google這個字，搞了十五分鐘，佢講咗一些我聽唔明白的說話就走了，但係再十五分鐘後，就神奇咁上得番網。咁之後我去李生間房，大家一齊食晚餐啦，當晚餐送入來時，我嚇咗一跳，因為送餐嗰個又係嗰位電腦部專業女士。一日之後，做完第一場騷，晚上大家開會於是叫咖啡，又係嗰位電腦部女士送咖啡。然後我問大家，係咪我眼花？你們間房係咪叫咩都係同一個人送來？間酒店好似晚上八點後，得番佢一個人，十項全能咁，你叫咩都係佢搞，好好笑。」
李宗偉親臨捧場
今次雲頂演唱會，羽毛球王李宗偉更加親臨捧場，克勤謂是他與祖兒跟對方早已相識，李宗偉更與祖兒合作過《報告教練》節目，之前對方來港，也有相約一起吃大閘蟹，本來今次大家想相約在大馬打波，但後來李宗偉撞了工作，所以只來看騷及一同慶功。稍後香港羽毛球公開賽，李宗偉會再來港，克勤話：「係呀，到時大家再約吃飯同睇下有冇時間打番場波囉。」容祖兒李克勤世界巡迴演唱會不經不覺已經巡了一年，唱了29 場，明年兩人仍會繼續巡唱下去，計劃中有上海、湛江、澳洲及歐洲等地方。