■郭羨妮會買聖誕樹及佈置賀佳節。新鴻基地產旗下12商場包括大埔超級城、新太陽廣場、元朗廣場及新翠商場等將率先送上歐陸特色聖誕，特邀郭羨妮（Sonija）與湛淇清昨日到尖沙咀出席新太陽廣場×聖誕普普藝術之旅「 柏靈頓寶寶熊聖誕世界巡遊」活動， 現場並有聖誕老人聖誕女郎出席，Sonija表示昨日是她今年出席的第一個聖誕活動，並喚醒她聖誕節快將來臨。
Sonija表示聖誕節是她喜歡的節日，屆時會買聖誕樹及佈置， 跟家人一起慶祝。問到會否去外地過一個白色聖誕？Sonija說：「未諗到去邊，囡囡比較鍾意海灘，不過佢聖誕前仲有跳舞比賽，老公又要工作，要再安排吓。不過囡囡都鍾意過白色聖誕，都想去英國，以前自己都去過，但未試過一家三口去。（會否準備聖誕禮物？）自己就無乜需要，家人開心就得。」
近日忙於在內地工作的Sonija，坦言想多留港工作，問到會否再拍劇？她說：「要睇劇本，因為拍劇好辛苦，拍攝時間要短啲，想多時間陪小朋友，（無綫可有接洽？）冇搵我。」Sonija表示最近去睇馬浚偉主演的舞台劇，大讚好睇。說到馬仔打算再做舞台劇，問到Sonija可會向馬仔自薦演出？Sonija說：「我去後台探馬仔班時，佢話下一部預埋我，叫我唔好推。」