潘頓成績雖然冇雷神咁標青，但現時依然可喺龍虎榜穩坐第二把交椅，目前有一批馬主好支持佢，例如「美麗」系，多數列陣嘅實力馬都搵佢騎，好似剛周日隻「美麗大師」，最終都搵番佢披甲贏馬。可能潘頓今季與「美麗」系班幕後人八字夾，今季「美麗」系所贏四場頭馬，兩場「美麗皇牌」，一場「美麗鉅星」（圖7號）及一場「美麗大師」，全出自潘頓胯下，由此可見呢季「美麗」系馬由佢話晒事，而潘頓相信亦會好好答謝呢班老細支持，盡量爭取最佳成績。
正如呢次喺第六場出戰三班一哩隻「美麗鉅星」咁，今季大摩一開波就將呢隻馬交俾潘頓搏殺，結果首戰即喺田草千四米搏殺成功，翌仗再出，馬房嘗試增程跑田草千六米，而呢次被捧成三倍大熱門嘅「美麗鉅星」，演出有啲走樣，發揮唔出應有威力，最終大熱倒灶而回，自呢役走樣後，今季第三次再出，潘頓冇再沾手，而係交俾祈普敦轉跑谷戰一哩，當然，潘頓放棄得嘅馬，好少會走漏眼，結果呢仗都冇成績交出，但最近呢場谷戰一哩，潘頓又攞番策騎權，呢場由於狀態麻麻，臨場有十五倍分頭，但潘頓真係冇漏眼，取回策騎權後，又立刻跑番一席第三名，而潘頓再接手呢隻馬前，佢只喺最後試跑期間摸過一課，所以賽前準備工夫唔係好積極，跑入第三名相信只係順其自然發揮，馬匹狀態並未真正回復最佳水準。假如以上仗入位準備工夫與今次相比，顯然有大大不同之處，上次馬匹入位，賽前潘頓只摸過一課，但今次嘅「美麗鉅星」，連同最後試跑，潘頓總共摸過四課，其中一課更係試大閘得第三名，咁樣大家可以從中比較一下，「美麗鉅星」今次潘頓係幾咁重視，馬房同呢隻馬再揀番出戰谷草一哩，亦顯出佢哋已有贏馬信心。